"Engainatzea, errealitatea desitxuratzea, eta egiten ari ez den lana justifikatzea" leporatu dio Lezoko EAJk EH Bilduri
EAJk, aurrekontuen zuzenketen eta emendakinen harira EH Bilduk egindako kritikak erantzun ditu. Kronologia bat osatu dute.
Lezoko EAJk, Lezoko EH Bilduk esandakoei erantzun die, aurrekontuen zuzenketen eta emendakinen harira. Erantzunaren zati bat hainbat datari dagozkien jardueretan dago oinarritua (beheko koadroan, hitzez hitz), eta bestea EH Bilduk esandakoen harira balorazio politikoa egin dute. Hala, Lezoko EAJk EH Bilduri leporatu dio “engainatzea, errealitatea desitxuratzea eta batez ere, egiten ari ez diren lana justifikatzea”. Era berean, koalizioak aurrekontuari egindako zuzenketak gobernu taldeak haiekin bildu gabe baztertu egin zirela esan zuen; “gehiegikeria handia” da hori Lezoko EAJren ustez. Horren aurretik, galdera bat plazaratu dute: “EH Bilduk apirilaren 28an egindako komunikatuak, azaroaren 26ko osoko bilkuran onartutako aurrekontuei buruzkoa, badu zentzurik?”.
Lezoko EAJren kritikek zuzenean jo dute Mikel Arruti EH Bilduren udal taldearen eledunarengana. Jeltzaleen ustez, Arrutik prentsarako ohar “edulkoratu eta terapeutikoak” bidaltzen ditu. “EH Bilduren ekarpena ezagutu nahi bada, begiratu zenbat proposamen aurkeztu diren udal erregistroan azken urteetan, eta horrek errealitatetik hurbilago dagoen ikuspegia emango du. Arruti jaunak, zoritxarrez bizitzen ari garen egoera bereziaren hasieratik, ez du pertsonalki gairik jorratu, eta hedabide eta sare sozialetara jo ohi du kritikak egiteko eta lankidetzan ez aritzeko”.
Lezoko EAJren esanetan, EH Bilduren eleduna “ez da inoiz ere egoerak eskatzen duen mailan egon, eta beraz, EAJ-PNVk uste du horrelako eraso bidegabeek, ez laguntzeaz gain, ez dutela egiarik ematen eta, batez ere, udaleko bizikidetza dohainik nahasten dute”.
Jarraian, eta Lezoko EAJk bidalitako oharrean hitzez hitz agertzen den modura, aurrekontuen emendakinen eta zuzenketen gaian jorratu duten kronologia:
- 2020ko irailaren 15ean, 2021erako aurrekontuen lehen zirriborroa jarri zen Munigexen (udalaren intraneteko zerbitzu-kudeatzailearen programa), teknikariek, zinegotziek edo talde politikoek beren ekarpenak, proposamenak edo zuzenketak egin zitzaten. EH-Bilduk ez zuen proposamenik aurkeztu (ez dago proposamenik ez Munigexen, ez udalaren erregistroan).
- 2020ko urriaren 15ean, azken zirriborroa jarri zen, prozesuarekin jarraitzeko eta proposamenak gehitzeko. Gauza bera: EH Bilduren proposamenik ez dago.
- 2020ko azaroaren 19an Informazio Batzordea egin zen, eta EH Bilduk ez zuen proposamenik edo zuzenketarik aurkeztu. Batzordean bertan ere ez zuen egin, eta bertan osoko bilkuraren gaiak ebatzi eta erabakitzen dira. Hori guztia egiaztatzeko, Munigex, udal erregistroa eta batzordeen aktak berrikus daitezke.
- 2020ko azaroaren 26an, aurrekontuen osoko bilkura egin zen, eta EH Bilduko bozeramaileak ahoz aurkeztu zituen bere zuzenketak (isileko adierazpena, aurrekontu prozedurarekiko ezjakintasuna edo errespetu falta adierazten duena). EAJ-PNVren ordezkariak adierazi zuenez, une horretan ahoz aurkeztu zituztenez eta aztertu ezin izan zituztenez, aurka bozkatuko zuten, eta, hori bai, haiek aztertzeko eta pertsonalki tratatzeko konpromisoa hartu zuten.
- 2021eko otsailaren 23an, EAJ-PNVko ordezkari bat Arruti jaunarekin harremanetan jarri zen, eta zuzenketak aztertzeko bilera egitera gonbidatu zuen. Mikel Arruti EH Bildiuko beste zinegotzi batekin batera agertu zen EAJ-PNVko zinegotzien bulegora, eta, sartzeari uko eginez, adierazi zuen EAJ-PNVk bazituela bere zuzenketak Aurrekontuen Osoko Bilkuraren aktan jasota (gogorarazi nahi dugu proposamenak ahoz egin zirela eta ez dutela inolako dokumentu garapenik edo ondorengo idatzirik).
