Papresak udalerrian duen eragina arintzeko, neurri plana
Bilera egin dute udala, Eusko Jaurlaritzak eta Papresak eta mahaia sortu enpresak herrian duen eragina arintzeko.
Papresa, Jaurlaritza eta Udalaren arteko bilera Papresak udalerrian duen eragina arintzeko neurri plana lantzen hasi dira Errenteriako Udala, Eusko Jaurlaritza eta Papresa. Duela astebete, joan den astelehenean zehazki bildu ziren Aizpea Oategi alkatea, Eneko del Amo Hirigintza zinegotzia, Jose Manuel Ferradas Ingurumen zinegotzia, Bernar Lemos Trafiko zinegotzia, eta aholkulari teknikoak udalaren aldetik, Javier Agirre Orcajo Ingurumenaren Kalitatearen eta Ekonomia Zirkularraren zuzendaria, eta Hipolito Bilbao Intxaurraga Kutsaduraren Prebentzio eta Kontrol Integratuaren arduraduna Eusko Jaurlaritzaren aldetik, eta Miguel Angel Sanchez GArcia CEO berria eta Papresaren presidentea. Alemaniako Quantum industria funtsak erosi du Papresa.
Bileran hiru gai aztertu zituzten udalak jakinarazi duenez prentsa ohar bidez: zuzendaritza berriak produkzioan planteatu dituen aldaketak eta hobekuntzak; ingurumen kalitate akustikoaren betetze maila; eta Paresak udalerrian duen eragina arintzeko neurrien plana egitea.
Mahai partekatuaren lan tresna, zehazki, azken hori izango da, asteleheneko bileraren emaitza izan zen neurrien plana. Aldian aldian bilduko da mahaia, Papresaren jarduerak udalerrian sortzen dituen inpaktuei modu integralean eta elkarrekin aurre egiteko: usainak, zaratak eta trafikoa dira inpaktu horiek udaletik zehaztu dutenez.
Enpresa eta udalaren arteko bilerak ohikoak direla zehaztu du gainera, udalak, “halere, hiru alderdiek positiboki baloratu dugu lan esparru hau sortzea, afekzioei modu integralean heltzeko aukera emango baitu, konpromisoak hartzen eta hobekuntzak ezartzen joateko borondate argia du, eta gainera, Eusko Jaurlaritzaren parte hartzea du, hari baitagokio Ingurumen Baimen Integratuan IBB jasotako neurrien jarraipena egitea eta bertan gertatzen den edozein aldaketa baimentzea”.
Iaz erosi zuen Quantum industria funtsak Papresa, eta proiektu industriala duela esan du udalak, “horren erakusle, 50 milioi euroko inbertsioa planteatzen duela da eta uztailetik 20 kontratazioa egin dituela”.
