2021eko udako kirol eskaintza martxan da
Dagoeneko eman daiteke izena astean zeharreko jardueretan, 9 eta 18 urte bitarteko gazteentzako eskaintza aurkeztu dute aurtengo udarako.
Zabalik da 2021eko udako kirol jardueretan izena emateko epea. 9 eta 18 urte bitarteko haur eta gazteentzako eskaintza aurkeztu dute aurten pasaiako elkarteek: piraguismoa, arrauna, mendiko bizikleta, pilota, eskalada, skatea, zunba… Orotariko jarduerak martxan dira.
Honako dokumentu honetan bildu dute eskaintza guztia eta oinarrizko informazioa. Izena emateko eskuorria ere jarri dute eskuragarri Pasaiako Udalaren webgunean.
UDA 2021 Kirol Kanpaina Oarsoaldeko lau udalek osatzen duten Eskualdeko Kirol Koordinazio Mahaiak (Pasaia, Lezo, Errenteria eta Oiartzun) antolatu eta bultzatu du. Aurtengo kanpainaren oinarria “askotariko jarduerak” egitea izan dela azaldu dute, baina aire librean eta beharrezkoak diren segurtasun neurriak hartuz.
Piraguen eta Stand Up Paddle-en alokairua
Pasaiako Udalak Donibaneko kirolgunean duen piraguen eta Paddel Board-eko taulen alokairu-zerbitzua ere jarri du martxan dagoeneko (Udako Kirol Kanpainako dokumentuan jaso dituzte tarifak).
Banakako zein binakako piraguak aloka daitezke, ordubeterako edota egun osorako. Halaber, uda osorako bonua ere egin dezakete ohiko erabiltzaileek. Ontzietan irteera gidatuak egiteko aukera ere eskainiko dute, aldez aurretik erreserba eginda.
Alokairuei buruzko informazioa Donibaneko kiroldegian eskura daiteke, edota bertara dei eginez (943 34 53 71). Zerbitzua garaiz eskatzeko gomendioa egin dute antolatzaileek, udan eskaera handia izaten baita.
