Eskualdeko ostalariak 'Euskadi Gastronomika' klubean sartzeko epea zabalik da
Eskualdeko establezimenduek hilaren 20ra arte eman ahal izango dute izena bereizgarria eskuratzeko. Hainbat abantaila eskainiko zaizkie, doan.
Euskadi mailan martxan dagoen proiektua da Euskadi Gastronomika, eta helburu nagusia euskal gastronomiaren papera nabarmentzea da, produktuaren bikaintasuna bermatzen duten zein zero kilometroko osagaien alde apustu egiten duten ostalaritza enpresen sare egonkorra osatuz.
Klubak ostalaritza-establezimendu berriak atxikitzeko deialdia ireki du, honela Errenteria, Lezo, Oiartzun eta Pasaiako establezimenduek bereizgarri hura lortu eta abantaila ezberdinez gozatzeko aukera berria izango dute inolako kosturik gabe, hala nola:
- Araba, Bizkai eta Gipuzkoan. Euskadi Gastronomika bereizgarria eta sustapen-euskarri turistikoetan presentzia, hala nola, EAEko turismo webgunea, gastronomia gida, etab.
- Eskualdean. Turismo bulegoetan sustapena, eskualdeko gida gastronomikoan eta Oarsoaldea Turismoaren webgunean presentzia.
Izen emate prozesuaren epea hilaren 20an amaituko da. Informazio zabalagoa eskatu edota bertan izena eman nahi duten establezimenduek, Oarsoaldea Garapen agentziako Turismo Sailarekin harremanetan jarri beharko dute Errenteriako Turismo Bulegora bertaratuz (Madalen kalea, 3. 20100 Errenteria) edo 943 49 45 21 telefonora deituz, bai eta helbide elektronikora idatziz ere.