'Mr. Link, jatorri galdua' eta 'Caminho longe' Zinema Ttikian
Lehenik haurrentzako emanaldia iragarri dute, eta ondoren familientzako dokumentala. Azken horren egileetako bat Gezalan izango da.
Lezoko Zinema Ttikiaren emanaldi bikoitza jasoko du larunbatean (hilak 15) Gezala Auditoriumak. Lehena haurrentzat da, ondorengoa familientzat.
16:30ean, Mr. Link, jatorri galdua animaziozko filma gozatuko dute haurrek. Atsedena hartu eta gero, 19:00etatik aurrera, Caminho longe dokumentalarekin osatuko dute saio bikoitza. Josu Martinezek eta Txaber Larreategik sortutako lana da. Azken horretarako sarrerak agortu egin dira.
Hemen azken lan horren sinopsi laburra: “Alfonso Etxegarai ETAko kide ohiak etxera itzultzeko bideari ekitea erabaki du hamarkadak eman ondoren Afrikako Sao Tome uhartean erbesteratuta, Espainiaren eta Frantziaren aginduz. Kristiane Etxaluz adiskide nekaezina dauka alboan”.
Lanaren egileetako bat, Hibai Castro (argazki zuzendari izan zen), emanaldian egongo da, eta harekin solasaldia egiteko aukera zabalik izango da.