Ikasleen bertso saioak ikastetxeetan izango dira
LH 5 eta 6 mailetako ikasleek aurten ere bertsolaritza landu dute. Ikasturte bukaerako jaialdia ezingo da Madalensoron ospatu.
Aurten ezingo dira Madalensoron elkartu [Arg.: @oiartzunudala]. Elizalde Herri Eskolako eta Haurtzaro Ikastolako LH 5. eta 6. mailako ikasleek aurten ere bertsolaritza landu dute ikasturtean zehar. Helburu da euskararen ahozkotasuna eta erabilera sustatzea, udal planak ezartzen duenaren harira.
Pandemia iritsi baino lehenagoko ikasturteetan, ikasleak mikroaren aurrean jarri eta jaialdi bat egiten dute Madalensoron, etxekoen presentziarekin. Aurten, baina, ezingo da pilotalekuan egin, COVID-19agatik.
Horregatik, ikasleek egindako lana beren ikastetxeetan erakutsi beharko dute, datorren astetik aurrera.
Hilaren 18an eta 25ean, Haurtzaro Ikastolako LH 5. eta 6. mailakoek saioak egingo dituzte ikastolako jantokian, eta ekainaren 1ean, Elizalde Herri Eskolakoen txanda izango da.
Kanpoko ikuslerik ez da izango aurten. Hala ere, ikasleen bertso saio horiek grabatu eta ikastetxeen sare sozialen bidez zabalduko dituzte.
