LGTBIfobia aldarrikapenekin ezabatu dute
Koldo Mitxelena ikastetxeko ikasleek askatasunaren alde egin dute gaur, LGTBIfobia onartezina dela gogoraraziz, aktiboki.
KOldo Mitxelena BHIko ikasleak LGTBIfobiaren aurka. Argazkia: Koldo Mitxelena LGTBIfobiaren Aurkako Nazioarteko Eguna da gaur. Dagozkien eskubideen aldeko borrokan urratsak egin baditu ere LGTBI+ Kolektiboak, oraindik orain, asko eta asko dira LGTBIfobiarekin lotuta pairatzen dituzten erasoak. Norbere genero eta identitatea aske bizitzeko eskubidea aldarrikatzen du kolektiboak, direna izan eta diren moduan bizitzeko askatasuna beste edonoren muga, epai eta juzkuetatik kanpo.
Aldarrikapen horrekin, gaur ospatzen den eta aldarrikatzen den LGTBIfobiaren kontrako nazioarteko egunarekin bat egin dute Koldo Mitxelena BHI ikastetxeko ikasleek, eta LGTBI+ kolektiboak aske maite eta aske bizitzeko duen eskubidea aldarrikatu dute. Ez da ordea, iniziatiba isolatua izan, urte osoko lanketaren emaitza baizik; izan ere, ikastetxearen arduradunek azaldu dutenez, Hezkidetza Proiektuaren oinarrietako bat da lanketa hori, eta ikasturtean zehar, egunez egun lantzen dute. Lanketa hori, baina, gaurkoan bereziagoa izan da, eta goiz goizetik aritu dira ikastetxea apaintzen ikasleak, baita informazioa zabaltzen gelaz gela.
Hori da gakoa, zalantzarik gabe fobia zentzugabeei erantzuteko, logika homofobo eta LGTBIfoboak deseraiki eta ezabatzeko bideetako bat, informazioa. Koldo Mitxelena ikastetxeko ikasleek askatasunaren alde egin dute gaur, LGTBIfobia onartezina dela gogoraraziz, aktiboki.
LGTBIfobiaren aurkako jardunaldiak
LGTBI+ Mahaiak Errenteriako Udalarekin elkarlanean jardunaldiak antolatu ditu, bestalde, LGTBIfobiaren Kontrako Nazioarteko Egunaren karietara. Gaurko egunarekin, herriko balkoi eta leihoak ortzadar koloreko banderez jostera deitu dituzte herritarrak. Iaz, konfinamendu betean heldu zen eguna, eta ikaragarria izan zen Errenteria-Oreretako bizilagunek eman zuten erantzuna, itzela benetan aniztasunaren alde erakutsi zuten konpromisoa, konfinamenduak eraso LGTBIfobikoak ageriago utzi zituen agertokian.
Aurretik bestelako hitzorduak egin dituzte, eta azkena, berriz, hilaren 22an helduko da. Valeria Vegasen Liberate liburuaren aurkezpena egingo du Irantzu Varelak Merkatuzarreko Jose Luis Caso aretoan, 12:00etan.
Aforo mugatuak ditu aurkezpenak egungo osasun krisia dela eta. Parte hartzeko beraz, ezinbestekoa izango da gonbidapenak jasotzea Niessen Kulturgunean.
