Deportazioa lehen lerrora ekarriko du Sare Herritarrak
Susana Panisello Sabate kataluniarrak, 'Los deportados de ETA. Los olvidados del conflicto' liburua aurkeztuko du Xenpelar Etxean hilaren 27an.
![](https://oarsoaldea.hitza.eus/site/files/2021/04/caminholonge_fotopelicula_22172.jpg)
Deportatuak, haien egoera, eta politika horren testuingurua zein izan zuen eragina aztertu du Susana Panisello Sabate kataluniarrak Los deportados de ETA. Los grandes olvidados liburuan. Txertoa argitaletxearekin ikusi du argia Paniselloren liburuak eta bere tesian oinarrituta dago. Bertan deportazioak zein testuinguru historikoan, estatu terrorismoak horietan jokatu zuen papera, politika hori ahalbidetu zuen araudia eta nola eta zergatik amaiera eman zitzaien aztertu du.
Deportatuengan izan duen eragin psikologikoaz ere mintzo da liburuan, ahanzturaren biktima sentitzen direla dio, eta aipatzen du ere emandako zerbitzua nola ordaindu zien harrera herrialde izan zirenei Espainiako Estatuak, eta zehazki, nola kobratu zuen Frantziako Estatuak. 1980. hamarkadan Frantzian errefuxiatuta zeuden euskal erakunde armatuetako 70 kidetik gora, Amerika eta Afrikako hamar bat herrialdetara deportatu zituzten: Panama, Ekuador, Dominikar Errepublika, Kubako Errepublika, Venezuela, Cabo Verdeko Errepublika, Gabon, Aljeriako herri Errepublika Demokratikoa, Sao Tome eta Principeko Errepublika Demokratikoa, eta Togoko Errepublika.
Deportazioa, Frantziako iritzi publikoaren aurrean Espainiako Estatura ez estraditatzeko aukeren artetik kalte gutxien eragiten zuena gisa aurkeztu zuten idazleak liburuan jaso duenaren arabera, “estradizioak baina, berehala heldu ziren”. Deportazioak kaltetutako pertsonak babesgabetasun egoeran eta linbo legal batean murgildu zituen.
Horretaz guztiaz, lehen eskutik mintzatuko da liburua idatzi duen Panisellok hilaren 27an, osteguna, Xenpelar Etxean Sare Herritarreko bozeramaile Iñaxio Oiartzabalekin batera. 19:00etan izango da eta sarrera librea izango da aforoa bete arte.