Judoaren kultura udalerrian sustraitzeko hitzarmena
Agustina Otaolan espazioa eskaintzeko hitzarmena sinatu dute udalak eta Gipuzkoako Judo Federazioak. Kirola sustatzeko modua izateaz gain, emakumeei ikusgarritasuna emateko aukera ere badela esan du Maite Gartzia Kirol Zinegotziak, "emakume asko biltzen baitira judoaren bueltara".
Maite Gartzia Kirol zinegotzia. Judoaren kulturak beti izan du tarte handia Errenteria-Oreretan. Udalerrian bertan, zein inguruko herri guztietan dago kluben bat. Urteetan Errenteria-Oreretan bizi izan duen loraldiari baina, udazkena heldu zaio. Izan zena eta herrian zuen lekua berreskuratu nahi dute, eta horren harira, Gipuzkoako Judo eta Kirol Elkartuaren Federazioak udaleko kirol sailera jo zuen praktika horri leku bat bilatu asmoz udalerrian bertan. Urteetan Galtzarabordako kiroldegiak hartu ditu maila askotako txapelketetarako tatamiak, baina gaur egun tarterik ez dagoela, “ekintzez lepo” dagoelako azaldu du Maite Gartzia Kiroletako zinegotziak.
Horren ordez, Agustina Oatola Pilotari Profesionalaren frontoia jarri zuten aukera gisa mahai gainean. EPLE aritzen da bertan, pilota modalitate ezberdinei emanda. Mahaiaren bueltan eseri, eta espazio hori partekatzea erabaki dute pilota eta judoak. Hala erakusten du Errenteriako Udalak eta Gipuzkoako Judo Federazioak sinatu duten hitzarmenak. Bi urteko iraupena izango du, eta beste bi urtez luzatzeko aukera izango dute bi aldeek,esperientziarekin gustura badaude, bederen.
Tatamiak, baskulak eta markagailua jasotzeko espazioa eman diote federazioari, eta halaber pilotarien agerleku izaten den kantxa baliatuko dute denboraldi bakoitzean gutxienez, bost jarduera antolatzeko, lehiaketa ofizialak eta lagunartekoak, lurralde eta autonomia eremukoak. Horiek doan eskuratu ahalko ditu jendeak.
Gartziak nabarmendu du frontoiaren erabilera partekatua posible egiteko izan den borondatea, eta zentzu horretan, EPLEren jarrera nabarmendu eta txalotu du: “Finean beraiek erabiltzen dute espazioa eta beraiek dute lehentasuna herriko kluba direlako”. Konplizitatea sortu da bi kirol modalitateen artean, zalantzarik ez da, eta elkar biziko dira Agustina Otaolan. Aurretik, baina, esperientzia errealera eraman dute eta duela lau bat aste proba egin dutela azaldu du Gartziak: “Kadete Mailako txapelketa antolatu zuten bertan eta espazioari egoki iritzi diote. EPLEkoak ere oso gustura azaldu dira Judo Federazioak egin zuen espazioaren erabilerarekin eta ondorengo txukunketarekin”.
Emakumeei espazio zabala
Judoaren balioak nabarmendu ditu Gartziak, eta diziplinaren ezaugarrietako bat jarri du erdigunean: Kirol horretan emakumeek duten presentzia. “Kirol munduan emakume asko dago, eta Judoa eta emakumeak bereziki daude lotuta. Hitzarmen hau kirola sustatzeko baliagarria izateaz gainera, emakumeei ikusgarritasuna emateko ere balioko duen zalantzarik ez da”.
Kirol zinegotziak, azkenik, herritar guztiak animatu ditu, Judora bereziki eta kirolara, orohar, hurbiltzera, “hura praktikatuz dela, edota lehiaketak antolatzen direnean haiek ikusle gisa disfrutatuz”.
