Errenteria eta Galiziako musika eta dantza ikasleak elkarlanean jarri ditu Atlantikaldiak
Herri Arte Eskolako musika eta dantza ikasle eta irakasleek eta Vigoko Eskola Municipal de Musica Folk e Tradicional eskolako ikasle eta irakasleek online topaketak egin dituzte hango eta hemengo musika eta dantzak partekatzeko.
Herri Arte Eskolako ikasleak azalpenak adi jarraitzen. aurreko ikasturteko saio batean. Berrasmatuta heldu zen, COVID-19ak hala eraginda Atlantikaldiaren ekitaldia iaz. Eta berrasmatze horrek bestelako lanketak ahalbidetu zituen. Irailean musika kontzertuak antolatu bazituzten ere, kultur artekotasuna eta sormena ardatz duten hainbat proiektu abian jarri zituzten urtean zehar garatzeko. Horietako bat da, Herri Arte Eskolako musika eta dantza ikasle eta irakasleak eta Vigoko Eskola Municipal de Musica Folk e Tradicional eskolako ikasle eta irakasleak elkarlanean jarri dituena. Euskal Herriko musika eta dantzak ezagutzeko aukera izan dute batzuek eta besteek elkarlan horri esker, eta momentuz, bi egunez, modu telematikoan izan bada ere elkarren berri izan dute ezagutza partekatzeko.
Joan den astean egin zituzten bi saio horiek, eta astelehenean zuzeneko konexioen bidez Galizia eta Euskal Herriko instrumentu eta dantzen berri eman zioten elkarri. Eskola bakoitzaren lan ildoak ere partekatu zituzten. Trikitixa eta Galiziako akordeoi diatonikoaren jatorri eta doinuak elkarbanatu zituzten lehenik, eta ondoren dantzarien txanda heldu zen. Asteartean txalaparta eta Galiziako eskuzko hainbat perkusio instrumentu izan ziren protagonistak; ondoren txitua eta beste aerofonoen txanda heldu zen; eta azkenik, galiziarrek harpa zeltikoa eta biolina bertako herri doinuei lotuta nola lantzen dituzten erakutsi zuten.
Topaketetako giro atsegina eta konplizitatea nabarmendu dute bi eskoletako kideek, eta osasun egoerak ahalbidetzen duenean aurrez aurreko saioren bat egiteko gogoa ere utzi dute agerian.
Topaketa pedagogiko horretaz harago, Herri Arte Eskolako ikasle eta irakasleek Gliziako bi artistarekin kontzertua ontzeko sukalde lanak aurreratuta daudela jakinarazi dute, “ondo bidean, irailean taularatuko dugu horren emaitza”.
