Txistuak bertsotan jarriko ditu Udal Txistulari taldeak
Udal txistulari Taldeak eta Xenpelar Bertso Eskolako bertsolariek emanaldi bateratua eskainiko dute.
Madalenaren basilikan izango da kontzertua. Hitzordu berezia egin dute igandea Udal Txistulari Taldea osatzen duten txistulariek. Txistu doinuek eta bertsolariek bat egingo dute 12:30etik aurrera Madalenaren ermitan eskainiko duten kontzertuan. Txistulari taldeak, Xenpelar Bertso Eskolakoak izango ditu lagun eta konplize hitzordu berezi horretan. Zehazki, Xabier Vesgaren zuzendaritzapean arituko dira Aitor Albistur, Aitzol Pikabea, Arkaitz Oiartzabal, Andoitz Antzizar, Jare Antzizar, Noa Barras, Mara Albistur, Ilargi Arozena eta Uxue Garcia bertsolariak, emanaldi berezi bezain kuttuna eskaintzeko bertaratzen den publikoari.
Honakoa da egitaraua: San Isidro Jose Ignacio Ansorena Minerrena; Pasaiko Herritik Alberto Santosen moldaketa; Betroiarena, Jose Ignacio Ansorena Minerrek moldatua; Iparragirre abila dela Jose Ignacio Ansorena Minerrek moldatua; Xenpelar Jose Ignacio Ansorena Minerrena; Basarritarra Isidro Ansorena Eleizegirena; Frantxiska Martina Isidro Ansorena Eleizegirena; Herri Jose Ignacio Ansorena Minerrena; Juana Bixenta Olabe Jose Ignacio Ansorena Minerrek moldatua; Saioarena Jose Ignacio Ansorena Minerrek moldatua; Habanera Jose Ignacio Ansorena Minerren moldaketa; Egun da Santi Mamiña, Jose Ignacio Ansorena Minerrek moldatuakoa.
Maria Madalenaren lagunen elkarteri esker ona adierazi dio txistulari taldeak eskainitako erraztasuna eta laguntzagatik. Bestalde, aforoa mugatua duela basilikak ekarri dute gogora, eta horrenbestez, bertaratzen direnei bertan emandako jarraibideei kasu egiteko eskatu dute.
