Autobus bat Julen Lobete eta Imanol Ezkurdia animatzera joateko
Real Bko bi jokalari lezoarrek Bigarren Mailara igotzeko finaletako bat jokatuko dute larunbatean Algecirasen kontra. Herrian autobusa antolatzen ari dira.
Imanol Ezkurdia eta Julen Lobete. Argazkiak: Real Sociedad. Julen Lobete eta Imanol Ezkurdia lezoarrak futboleko Espainiako Bigarren Mailara igotzeko zorian daude, SmartBank Liga delakora. Real Sociedad B taldeko jokalariak dira, eta larunbatean Bigarren Btik goragoko mailara igotzeko lau finaletako batean ariko dira bi lezoarrak, Algeciras taldearen kontra. 20:00etan hasiko da lehia, Almendralejoko (Extremadura, Espainia) Francisco de La Hera zelaian. Irabazten badute, haiena da estatuko bigarren liga nagusian aritzeko lau plazetako bat; besteak hiruak beste hiru finaletan esleituko dira.
HITZAk jakin ahal izan duenez, Lezon autobusa antolatzen ari dira Almendralejo aldera joateko; larunbateko 06:00etan dira ateratzekoak Extremadura aldera. Hemen klik egin, eta bidaiaren ordutegia, prezioa eta ibilbidea nahiz kontaktua ezagutzeko aukera dago.
Finalerako txartela igandean lortu zuten Xabi Alonsok entrenatutakoek, 2-1 irabazita Andorra taldeari. Julen Lobetek egin zuen txuri-urdinen bigarren taldeari finalean egoteko aukera eman zion gola, 2-1ekoa.
Julen Lobetek Kadete-Haur Mailara arte jokatu zuen herriko taldean, Allerrun. Ezkurdia, berriz, ez da taldeko partaide izan, baina Unai Santos Allerruko kideak nabarmendu du eskolan laguntzaile bezala ibilitakoa dela. “Oso harro gaude biekin. Ez Allerrun bakarrik, herri osoa dago harro. Sekulakoa da Lezok bi jokalari izatea Sansen”. Santosek nabarmendu du Jokin Uria izan zela azken lezoar erreferentea Realean, “ea mailaz igotzea lortzen duten, eta Lezoren izena gehiago zabaltzeko aukera duten zelaietan”.
