Aurreko asteburuetan gertatutakoei buruzko iritzia eman du udalak
Norberaren beharrak kontuan hartzen dituela esan dute, baina komunitate baten parte garela gogorarazi du. Jarrera eraikitzailearen alde egin dute.
Oiartzungo Udalak oharra bidali du, aurreko asteburuetan herrian gertatutakoen harira egindako hausnarketarekin. Pertsonek sozializatzeko duten beharra azpimarratu dute lehenik eta behin.
“Pertsona guztiok gure egunerokotasuna aldatu genuen duela urtebete eta oraindik gure ohiturak eta gure ekintzak moldatuak ditugu. Pertsona sozialak gara eta denok ditugu beharrak, norbanako bezala eta baita kolektiboki ere. Gaurkoan kolektiboki ditugun behar horiek nabarmendu nahiko genituzke”.
Etxeratze agindua kendu denetik, oiartzuarrak kalean elkartu direla nabarmendu du udalak, “elkarrekin egoteko, jateko, edateko…”. Baina ez horretarako bakarrik: “Baita ere soinua ateraz ordu txikitan, ingurua zikina utziz, bizilagunei deskantsua galarazten”.
Zehaztu dutenez, herritarrak elkartzean ez dira kuadrilla bati buruz, baizik eta “hamarnaka pertsona inguru berean” elkartzeaz.
Komunitatea zaindu
Norberaren beharren eta komunitateko parte izatearen arteko oreka eskatu du udalak. “Inguruko herritarrak ere zaindu nahi eta behar ditugu. Zer da norberaren askatasuna, ingurukoak eta ingurua ez badira errespetatzen?”, gaineratu dute.
Horrela, azken aste hauetan jarrera batzuk “onartezinak” izan direla iritzi dute, eta ez dutela kolektibo bakar batera mugatzen argitu dute. “Jarrera onartezinak gaztetxoenetik hasi, gurasoak, helduak… adin eta izaera anitzeko pertsonak izan baitira gertaera hauetan”.
Horrelakoak ez errepikatzeko baliabideak jarriko dituztela iragarri du udalak, baina horiekin ez dela nahikoa. “Soluzioa ez dela zikinkeria garbitzea, edota udaltzainak jartzean herriko hainbat txokotan arauak errespetarazteko neurriak hartzen. Hori egin behar badu Udalak, egingo du, baina herri bezala eta komunitate bezala landu behar da gaia”.
Udalak “heziketaren alde” egingo duela adierazi du, antolatzen diren gauzak “eraikitzaileak” izateko. Argi utzi dute gehiengoaren jarrera ere “eraikitzailea” dela uste dute, eta herritar guztien jarrera horrelakoa izan dadin lanean jarraituko dutela jakinarazi dute.
