"Jendea gero eta kontzienteagoa da jaten duenarekin; Oiartzunen indartsua da kontzientziazio hori"
Papurrak izeneko proiektua abiarazi berri du Adurizek. Zokolo bidean du ogia eta gozoak egiteko tailerra. Modu naturalean egindako ogia eskaini nahi die oiartzuarrei.
Papurrak proiektua abiarazi du Adurizek [Argazkia: Eneko Salaberria / Dixidu]. Goiatz Adurizek hilabete honetan eman du jarduera profesionalaren alta, baina urtebete inguru darama ogia egiten. Bere ustez, Oiartzunen badago janari osasuntsuarekiko kontzientziazio indartsua. Papurrak ogi eta gozo faktoriak ildo horrekin bat egiten du.
Noiz bilakatu zen okina izatea zure ogibide?
Horretan nabil. Maiatzaren 1ean eman nuen alta autonomoetan, eta oraindik inbertsioa handiagoa da irabazten dudan dirua baino. Iazko otsailean lanik gabe geratu nintzen, Bartzelonako Mobile World Congress bertan behera geratu baitzen. Geroztik ez da berreskuratu; orain hastekotan daudela ematen du.
Itxialdian, planeta erdia bezalaxe, ogia egiten hasi nintzen. Betidanik gustatu izan zait ogia egitea, eta jo eta fuego hasi nintzen. Pixkanaka lagunei eman nien; haiek animatu ninduten serioago hastera. Urte honetan etxean ogi bat egitetik, txoko bat edukitzera eta webgune bat abiaraztera pasatu naiz, eta saltzen hasi naiz. Ea errentagarria izatera iristen den…
Okina izateko bidean dagoenaren eguneroko ogia nolakoa da?
Orain goizeko 03:00etan esnatzen naiz, pixka bat lehenago, haurra ikastolara eraman behar dudalako. Ostiraletarako bakarrik egiten dut ogia; asteazken, ostegun eta ostiraletan aritzen naiz. Astelehen eta asteartea negozioaren beste arlo batzuei eskaintzen diet.
Ogia egiten hasten naiz 03:00etan, eta eguerdirako prestatzen ditut mazak. Haurra ikastolatik etorri, eta arratsaldetan bukatzen ditut gauzak. Hiru egun horietan egun osoa pasatzen dut lanean. Larunbaterako leher eginda nago… Zenbat eta gehiago egin, orduan eta agudoago lortzen dituzu gauzak egitea. Denarekin bezala.
Beraz, ogi gogorrari, hagin zorrotza?
Gustuko lana da. Bartzelonan nengoenean, produkzioa handia zen. Ohitua nago lan asko egitera.
Ogia orain edozein tokitan eros daiteke, edozein modutakoa. Merkatuak zatirik uzten al du artisau ogiarentzat eta Papurrak bezalako proiektu batentzat? Ala kontsumo azkarra eta merkea bilatzen da eta apurrak besterik ez dira geratzen?
Itxialdian egon da ogiaren boom antzeko bat, eta jendea konturatu da zein alde dagoen ogi merke txar batetik denbora behar duen ogi osasuntsu batera. Ez du zer ikustekorik. Galdetu didate ea konpetentzia egin behar dudan; ez, bi produktu erabat ezberdinak dira. Nirea jateagatik ez duzu zertan bestea ez jan.
Jendea gero eta kontzienteagoa da jaten duenarekin; nondik datorren eta zein onura daukan, bai norberarentzako baita gizartearentzako ere. Oiartzunen badago kontzientzia indartsua: Labore, Arraztalo, Elika… Mugimendua dago. Pentsatu nahi dut badagoela merkatua.
[Argazkia: Aintzane Otaegi].
Zein da Papurrak-en eskaintza?
Ama orearekin egindako lau ogi biribilak: zuria; integrala; bost haziduna eta intxaurrak eta mahaspasarekin —azken biak bi irinen nahasketarekin—. Moldeko bi ogi mota ere egiten dut: gurinadun brioche zuria; bestea, integrala, oloa eta sesamoarekin.
Zekaleko ogi integrala ere egiten dut, ama orearekin. Gozoak diren beste bi produktu ere bai: kanelazko biribilkia eta azenario pastela.
Nola eros daiteke?
Eskaera bidez egiten dut ogia. www.papurrak.eus-en eskatu eta ordaindu behar da, astearteetako 18:00ak baino lehenago, ostiralerako izan nahi bada egutegi batekin zehazten da. Internetekin moldatzen ez direnei salbuespena egiten diet, eta telefonoz hartzen diet enkargua (620 894 486).
Bezeroarekin harreman zuzena mamitzen al da?
Ogi bila etortzen dira, interesatzen zaie lekua, erakusten diet nola egiten den ogia… Ordutegia badaukat bila etorri behar dutenentzat, 10:00etatik 18:00etara. Pixka bat beranduago etortzen badira, edo eguerdian haurraren bila ikastolara joaten naizenean, moldatuko gara ogia jasotzeko aukera izan dezaten. Herriko eta inguruko jendea da.
