Bretoiera bultzatzeko Redadegeko lau kilometro erosi dituzte Oiartzunen
Gaur hasi da, Karaezen, bretoieraren aldeko lasterketa. Udalak, Oiartzun Karaez Senidetza Elkarteak, Haurtzarok eta AEK-k kilometro bana erosi dute.
Kilometroa erosi duten lau erakundeetako kideak, Oiartzun-Karaez senidetza irudikatzen duen eskulturaren aurrean. Redadeg hasi da gaur, Karaezen (Oiartzunekin senidetuta dago). Bretoieraren aldeko lasterketa da, Korrikaren antzekoa. Hilaren 29ra arte Bretainia zeharkatuko dute.
Orain dela hiru urteko ekitaldira Oiartzungo ordezkariak joan ziren. Aurten ezingo dute fisikoki parte hartu. Bretoieraren aldeko konpromisoa beste modu batera egin beharko dute, distantziatik. Horregatik, lasterketaren lau kilometro erosi dituzte herriko beste hainbeste eragilek.
Oiartzungo Udalak, Oiartzun-Karaez Senidetza Elkarteak, Haurtzaro Ikastolak eta Intxixu-AEK-k erosi dituzte kilometro horiek. Atzo elkartu ziren lau eragileetako ordezkariak, elkarrekin argazkia ateratzeko.
Ikastolaren kilometroan, esaterako, Gwenedeko diwaneko —bretoierazko eskolak— ikasleek eramango dute lekukoa. Edozein laguntza eskertuko dute diwanekoek, gaur bertan Frantziako Konstituzio Kontseiluak ebatzi baitu hezkuntza murgiltze eredua konstituzioaren kontrakoa dela.
