50 urte auzogintzatik bidea urratzen
Agustinetako auzo elkarteak 50 urte bete ditu. Erakusketa, aldizkaria eta zozketa ere antolatu dituzte mende erdia ospatzeko.
Agustinetako Auzo Elkarteko egungo kideak 50. urteurrena aurkezteko agerraldian, Etxeberri baserriaren aurrean, auzoko azkena. Berebiziko garrantzia dute auzoentzat, haien lanari esker, babestea, bizilagunen interesak defendatzea, beharrak mahai gaineratzea, finean, bizirik mantentzen dira auzoak. Auzo elkarteak dira, eta 1960 eta 1990. hamarkaden artean garrantzi bizia izan bazuten ere, batez ere hirigintza arazoekin lotuta, baina baita auzoen izaera aldarrikatu eta hamaika kultur ekitaldi antolatzearekin, gaur egun ere ezinbesteko dira auzoen eta auzotarren defentsan.
Horietako bat da Agustinak auzoko auzo elkartea. 50 urte, mende erdia bete du auzoaren eta auzotarren defentsan lanean hasi zenetik, eta baldintzatuta bada ere COVID-19aren agertokian, urteurrena ospatuko dute. Gaur egin dute antolatutakoaren aurkezpena egungo auzo elkartea osatzen duten bizilagunetako batzuk, eta haien izenean mintzatu da Laura Selgas auzotarra eta gida batzordeko kidea. Hark azaldu du antolatutako ekintzak. Hilaren 27an erakusketa zabalduko dute: “Erakusketara elkartearekin eta auzoaren garapen urbanistikoarekin zerikusia duten argazkiak, dokumentuak eta objektuak bildu dira”.
Auzoa zaharragoa da, baina auzo elkarteak 1971n hasi zuen bidea, eta ordutik aurrerakoak dira argazki eta objektuak. Erakusketa 17:00etatik zabalduko dute ostegunean eta ekainaren 3ra arte izango da ikusteko aukera; astean zehar 17:00etatik 20:00etara eta asteburuan 11:00etatik 14:00etara bisitatu ahalko da.
Zozketa txiki bat ere prestatu dute erakusketara hurbiltzen diren herritar guztien artean egiteko, “auzoko eta udalerriko hainbat saltokiei esker antolatu ahal izan dugu, eta eskerrak eman nahi dizkiegu guztiei laguntzagatik”.
Duela hiru hamarkada auzo elkartea argitaratzen hasi zen aldizkariari ere egingo diote aitortza: “1990. hamarkadaren amaieran eta 2000. hamarkada hasieran elkarteak argitaratu zuen Austintxo aldizkaria gogoraztea eta omentzea dugu helburu, eta horretarako ale berezi bat argitaratuko dugu. Auzoko buzoi guztietan banatuko dugu aste honetan”. Kontrazal berezia du aldizkari horrek, gaur agerraldia egin duten Migel Alduntzin kaleko 36. zenbakiko Etxeberri baserriko sarreraren irudia du, “hau da auzoan gelditzen zaigun azken baserria eta keinu egin nahi genion”.
Elkarteak biziki eskertu du ospakizun berezirako metarialak eta bere denbora laguntzeko eskaini duten auzotarrei, “finean, 50 urte hauetan frogatu den bezala, auzo elkartea jendearen inplikazio altruistari esker mantendu da bizirik, eta hori da ospatu eta aitortu nahi duguna”.
