EAJ: "Aurrekontuan txertatutako proiektuak bete daitezen lanean ari gara"
Parte hartze ordenantza da txertatutako horietako proiektuetako bat, eta, horren inguruan hitz egiteko bildu berri direla Elixabete Murua eta Garbiñe Oiarbide EAJko ordezkariak Gizarte parte hartze saileko zinegotziarekin jakinarazi du alderdi jeltzaleak.
Elixabete Murua EAJren bozeramailea eta Garbiñe Oiarbide zinegotzia, artxiboko irudi batean. Aurtengo aurrekontuari hainbat proposamen egin zizkion EAJ udal taldeak, eta gobernu taldearekin adostuta horietako batzuk proposamenean jaso ziren. Aurrekontu guztiari jarraipena egingo ziola esan zuen orduan EAJk, baina bereziki beren iniziatibaz txertatutako proiektuei. Hala, parte hartze ordenantza da txertatutako horietako proiektuetako bat, eta, horren inguruan hitz egiteko bildu berri direla Elixabete Murua eta Garbiñe Oiarbide EAJko ordezkariak Gizarte parte hartze saileko zinegotziarekin jakinarazi du alderdi jeltzaleak: “Uste dugu, lehenik eta behin, parte hartze arloan egin dugun ibilbidea aztertu behar dugula, eta era berean errenteriarrak ahaldundu behar ditugula udaleko erabakietan parte har dezaten”. Hurrengo urteko aurrekontuan aurten helburu horretara bideratuko den diru zatiak, segida izan beharko duela dio EAJk.
Orain arteko ibilbidearen gaineko hausnarketa egitearekin batera, ahalduntze lana egitea ere beharrezkoa ikusten dute jeltzaleek, “erremintak eman behar zaizkie hartzen duten konpromiso hori ahalik eta modu egokienean bideratzeko eta zentzu horretan, herritarrak, gaitu beharra dagoela uste dugu. Helburu orokorra etorkizunean errenteriarron parte hartzea bideratuko duten joko arauak lantzea bada ere, etorkizuneko prozesuak anitzak eta aberatsak izan daitezen herritarrengan parte hartzerako grina indartzea ere bada helburu nagusietako bat”.
Parte hartze prozesuarekin bezala, beste proiektuekin ere lanean ari dela gaineratu du EAJk.
