50 urte zituen uraren araudia berritzea erabaki du plenoak
Gai zerrendatik kanpo, asteburuetako gertakariak izan dituzte hizpide. Jexux Leonet alkateak esan duenez, ez dute "irtenbide magikorik" eta ezin dela herria poliziaz josi.
Puntu guztiak aho batez onartu zituzten. Maiatzari dagokion udalbatzarra egin zuten atzo arratsaldean. Gai guztiak aho batez onartu zituzten.
Uraren hornidurari buruzko arautegia onartu zuten: duela 50 urtekoa zen indarrean zegoena. Egoera eta sistema berrietara egokitu dute erregelamendua.
Udalak ur horniketa sistema propioa du, baina Añarbeko Urek sistemaren zein uraren edangarritasuna kontrolatzen ditu. Hitzarmena berritu zuten atzo.
Bestalde, Oarsoaldea Garapen Agentziari 2021 honetan egin beharreko ekarpena ere onartu zuten: 383.492 euro bideratuko dituzte.
Besteak beste, onartu zuten Idoia Landa izango dela ordezko bake epailea eta aurtengo herriko jai egun ofiziala abuztuaren 3a izango dela (Xanisteban Eguna).
Asteburuak, hizpide
Gai zerrendatik kanpo, asteburuetako jende pilaketak aipatu zituen Janire Mitxelena EAJren bozeramaileak. “Asteburuetan gertatutakoak tristura, kezka eta ardura sorrarazten digu. Jende pilaketak sortzen dira, kalean edateko, eta zarata egiten da”, azaldu zuen Mitxelenak. Oiartzuarren gehiengoaren jarrera txalotu zuen, hala ere.
Iragarri zuenez, bere udal taldeak udal gobernua babestuko du horrelako jokaerekin bukatzeko aurrera eramaten dituen neurriekin.
Jexux Leonet alkateak erantzun zion. Berak ere nabarmendu zuen oiartzuar gehienek “zintzo eta arduraz” jokatu dutela, eta COVID-19aren eragina beste herrietan baino txikiagoa izan dela, “agian”.
“Zuhurtasun osoarekin”, gaur egun argia ikusten ari dela esan zuen, eta herritarrak nekatuta daudela. Hala ere, asteburuetako gauetan dauden hainbat jarrera kezkaz ikusten dituzte. “Nola aurre egin diezaiokegu horri? Udaltzainen txandak indartu dira, baina jarraitu dute gertatzen”, esan zuen alkateak.
Aitortu zuen arazo hori saihesten saiatzen ari direla, baina ez dutela “formula magikorik”. Argi utzi zuen ez dutela uste herria “poliziaz jostea” irtenbidea denik. “Ostalaritzako ordutegiak zabaltzen joango diren heinean, behar batzuk asetzen joango dira”, iritzi zuen.
Herriko kolektiboekin hitz egiten ari direla eta horretan jarraituko dutela esan zuen, eta udako festarik ez egoteak jende pilaketak astebururo izateko aukerak handituko dituela.
