Oinherri ezagutaraziko dute ekainaren 5ean, aurkezpen ekitaldi eta tailerrarekin
Zer nolako Oiartzun nahi duten irudikatuko dute haurrek, tailer batean. Ondoren, Oinherriren filosofia azaltzeko aurkezpen ekitaldia egingo dute.
Oinherriren Oiartzungo lantaldea. Oiartzun herri hezitzaileen sarera batu zen duela pare bat hilabete. Oinherri osatzen duten taldeek sortutako sarea da, eta orain herriko lan taldeak Oinherriren filosofiaren berri emango du.
Ekainaren 5ean —larunbata— tailer eta aurkezpen ekitaldi bana antolatu dituzte. Tailerrean Nolako Oiartzun nahi dute haurrek? galderari erantzungo diote, Arizmendieneko lorategian. Eguraldi txarrarekin Elizalde Herri Eskolako pilotalekuan izango da saio hori.
Toki berean, 12:30ean, Oinherriren aurkezpena egingo dute, horren berri izan nahi duenarentzat. Oinherriren filosofia aurkeztu eta herriko haur eta gazteek amesten duten Oiartzun nolakoa den azalduko dute.
Tokia mugatua denez, gomendagarria da aldez aurretik tokia erreserbatzea.
Oinherri
Oinherri egitasmoa Euskal Herriko herri hezitzaileen sarea da. Aisialdi hezitzailea sustatzea du helburu, jolasaren eta sormenaren bidez. Komunitatearen parte-hartzea, kolektibotasuna eta euskara oinarri dituen aisialdi eredua aldarrikatzen du Oinherrik.
Oiartzungo Udalak eta Oinherrik lankidetza hitzarmena sinatu zuten pasa den martxoan. Ordutik lan talde bat sortu da herrian. Guraso, irakasle eta hezitzaile batzuek hartzen dute parte hor, Olaia Lasa eta Haizea Saez de Egilaz Gizarte-Ongizate eta Gazteria zinegotziez gain.
