[Bideoa] Lezoko aisialdia "hankaz gora" jartzera heldu da Txirbilla taldea
Hogei bat gaztek sortu dute aisialdi taldea, "herrian bertan eta herrikoentzat sortutako aisialdia eskaintzeko". Atzo eman zuen egitasmoaren berri.
Joan den astean askok Lezoko kaleetan sinadurarik gabeko logotipo antzekoak ikusiko zituzten. ‘Zer da hau?’, galdetuko zuten askok. Bada, jada ezaguna da logotipo kiribila zer den, norena den: Txirbilla Aisialdi Taldea sortu dute.
Hogei bat gaztek sortu dute taldea. “Gure herrian bertan eta herrikoentzat sortutako aisialdi taldea da”, zehaztu dute egitasmoaren bultzatzaileek. Hala, Haur Hezkuntzatik hasi eta Batxillergora arteko haur eta gazteak bildu nahi dituzte haien eskaintzara, “aisialdia hankaz gora jartzeko jaio da Txirbilla”, esan dute aurkezpen bideoan (behean dago).
Atzo bertan, egitasmoaren berri lau haizetara zabaltzeko kalera atera ziren gazteak, mozorrotuta, alai arraio. Gaur bertan eman dute sare sozialen bitartez egitasmoaren berri. Lezon irribarre bila ariko dira, “eta egingo dugu eztanda!”.