Domina uzta Pasaia Kayakentzat Itsas Kayakeko Gipuzkoako Txapelketan
Urrezko domina bat, zilarrezko hiru eta brontzezko bat lortu zituen talde pasaitarrak bakarkako lanean. Taldekako sailkapenean, bigarren.
Talde pasaitar osoa probaren ondoren, dominak paparean eta Lander Rodriguezek taldekako txapeldunordearen kopa eskutan duela. 
Larunbatean Zumaian izandako Gipuzkoako Txapelketa irekian 60tik gora kirolari bildu ziren senior eta beteranoen kategorietako probetan. Eguraldiak ez zuen lagundu, iragarritakoa baino haize-olatu gehiago izan baitziren, baina emaitza onak lortu zituen talde pasaitarrak euskal uretan jokatutako itsas kayakeko lehen proban
Gizonezkoen arteko lehia bikaina izan zen K-1 ontzietan, eta Lander Rodriguez pasaitarrak maila eman zuen garaipen biribila lortzeko, hasi eta buka. Senior kategoriako gipuzkoarren arteko garaile izateaz gain, proba osoko K-1 azkarrena izan zen. “Garaipen bikaina eta distira bereziko urrea”, adierazi du harrotasunez Txema Yarza klubeko presidenteak, “bere nagusitasuna nabarmenduz brankaz, poparean eta itsas adarreko amaierako 800 metroko tarte gogorrean”.
K-2 kategorian bigarren izan ziren pasaitarrak probaren sailkapen orokorrean zein Gipuzkoako Txapelketan, Donostia Kayakeko ontziaren atzetik eta Zumaiako lehenengo ontziari 35 segundoko tartea kenduz, poparean eutsiz.
Amaia Benavente errenteriarrak ere ondo eutsi zion erronkari, eta uretako entrenamendu gutxirekin bada ere, bigarren gipuzkoarra izan baitzen sailkapenean. Bigarren gipuzkoarra izan zen, halaber, Antton Araneta senior kategorian, eta hirugarren gipuzkoarra, aldiz, Txema Yarza beterano master kategorian.
Hori horrela, urrezko domina bat, zilarrezko hiru eta brontzezko bat lortu zituen talde pasaitarrak Gipuzkoako txapelketan bakarkako lanean, gehi taldekako sailkapenean lortutako bigarren postua. Orain, Plentzian hilaren 20an jokatuko den XVI. Euskadiko Kopako lehengo proba (lau dira guztira) izango da itsas klubaren hurrengo hitzordua.
