[Galeria] Asteburuko "ekintza bandalikoak" gaitzetsi ditu Lezoko Udalak
Larunbat gauean kale zurrutean hainbat pertsona izan zirela zehaztu du udalak, "gazteak eta helduak zeuden. Inguruko herrietako jendea ere ikusi zen".
Edukiontziak botara, Euskal Herria plazako parkinaren atarian. Argazkia: Lezoko Udala. Lezoko Udalak kezkaz betetako oharra helarazi du hedabideetara, larunbat gauean izan ziren gertakarien harira. “Lezo, kalte material ugarirekin esnatu zen igandean, larunbat gauean antolatutako legez kanpoko kale zurruten eraginagatik: edukiontzi irauliak ikusi ziren, eskola publikoko leihoetan kalteak, kristal hautsiak, feriaren eremuan kalteak, edari eta janari zaborra parke eta bankuetan…”, zerrendatu dute udaletik. Horren harira, “ekintza bandaliko” horiek erabat gaitzetsi ditu udalak, “horiek guztiak salatu nahi ditugu. Herritarrei jarrera egokia izan dezaten eskatzen diegu”.
Udalaren arabera, azken asteburuetako gauetan kale zurruta egitera biltzen dira hainbat pertsona. “Lekukoen arabera” zehaztu nahi dute udaletik, “asteburu honetan sortutako taldeetan gazteak eta helduak zeuden. Inguruko herrietako jendea ere ikusi da Lezon festa giroan”. Udaltzainek jasoa dute “jendearen masifikazioa gero eta handiagoa” dela. Egoera epidemiologikoak hobera egin duela adierazi du udalak, “baina pandemia garaian bizi gara eta distantzia sozialaren arauak errespetatu behar ditugu, besteak beste”.
Hartara, asteburu honetako kalteak “garestiak” direla adierazi du udal gobernuak, eta horiek udal aurrekontuari eragiten diotela: “Diru hori guztion artean ordaintzen dugula gogorarazi nahi dugu”.
Ondoko irudiak Lezoko Udalak HITZAra bidalitakoak dira. Igande goizean ateratakoak dira.
