[Elkarrizketa] "Herriari zein ekarpen egin nahi diogun adierazteko une egokia da"
Kilometroak 2023 jaia antolatzeko erronkari heldu dio Orereta Ikastolak; orain 22 urte antolatu zuen azkenekoz. Ikastolaren balioak eta herriari egin nahi dion ekarpena adierazteko unea izango dela jaia dio lehendakariak.
Itziar Navarro. Orereta Ikastolak antolatuko du Kilometroak 2023. Zergatik erabaki zenuten hautagaitza aurkeztea?
Gipuzkoako ikastolek antolatzen dugu Kilometroak txandaka. Guk orain 22 urte antolatu genuen azkenekoz, 1999an, eta aurretik 1984an. Aspaldian ez genuela antolatu ohartu gara, eta egungo guraso belaunaldiak ez duela bizi gaia barrutik. Handia bihurtu da oso jaia, eta antolatzeko prest izango den jendea topatzea ere zailagoa bihurtu da, lan handia eskatzen duelako.
Zuek ausartu zarete.
Aztertu genuen eta iruditu zitzaigun eduki genezakeela sare bat, komunitate barruan zein kanpoan, erronka horri indarrez heltzeko. Herriko eragileekin ere harreman ona daukagu. Hala, hitzarmena dugu Ipar Euskal Herriko hainbat ikastolarekin Zubiak eraikiz proiektuaren barruan, eta Nafarroan ere ari gara ikastola batzuekin elkarlanean. Saretxo bat badugu erronkari erantzuteko.
Zer suposatuko du berriro jaia hartzeak?
Eredua bera aldatu egin dela hartu behar dugu kontuan. Urte batzuk generamatzan Gipuzkoako ikastoletan gogoeta egiten, jaia oso bolumen handikoa bihurtu zelako, baita nolabait ere, pasibo. Gogoeta egin ondoren, helburua izan da eredua aldatu eta parte hartzaileagoa bilakatzea jaia bera, sormenari lotuagoa, eta urtean zehar ekintza gehiago prestatzea. Ez izatea soilik ikastola antolatzailea ari dena jardunean, beste ikastolek ere egin ditzatela keinu batzuk urtean zehar. Eredua, beraz, berrituta helduko da 2023an.
Zein aldarri egingo duzue?
Ikastolak berezkoak dituen ezaugarriak ezagutarazi nahi ditugu bai gure komunitatean zein jendartean, sorreratik ditugun ezaugarri horiek momentu batzuetan lausotu egin direlako. Une egokia izan daiteke ikastola zer den barruan gogoratzeko eta kanpoan adierazteko, eta zein ekarpen egin nahi dion herriari. 2023an, gainera, 60 urte beteko ditugu.
Eta zein dira ekarpen horiek?
Finean, eredu eraldatzailea proposatzen du ikastolak. Herritarrek sortutakoa da, euskara eta euskal kulturan oinarritua, eta nazio ikuspegi batekin lan egiten dugu administrazio ikuspegiez gaindi; euskararen lurralde osoa hartzen dugu. Irabazi asmorik gabeko erakundeak gara, kasu askotan kooperatibak, gurasoek eta langileok daukagu jabetza; horregatik hartzen dugu parte egunerokoan. Horiek guztiak indartu nahi ditugu jaiaren bidez, pentsatuz guk proposamen bat egiten dugula baina ez garela bakarrak.
Hezkuntzan beste eragile asko daude eta horiekin elkarlana garrantzitsua da. Denok gara beharrezkoak gizartea hezkuntzatik aldatu nahi badugu. Gaur egun oraindik ere halako jai bat antolatzearen zentzua azaldu nahiko nuke, bestalde. Ez ditugu garai bateko beharrak, baina ikastolak Euskal Herri osoan gaude zabalduta, eta beste lurralde batzuetan egoera ez da batere ona, Nafarroan eta Ipar Euskal Herrian kasu. Azkenean, jai hauek badira une bat zailtasunak dituzten ikastola horiekin elkartasunez jokatzeko.
