[Galeria] Amesten duten Oiartzun marrazten hasi dira
Oiartzungo Oinherrik lehen urratsak egin ditu gaur Arizmendieneako lorategian. Tailerren ondoren, aurkezpen ofiziala egin dute.
Oinherri zer den azaldu dute gaur Oiartzunen. Hitzekin, eta ekintzekin. Pare bat hilabete dira Oiartzunek bat egin zuela Oinherrirekin, herri hezitzaileen sarearekin. Eta gaurkoa hori irudikatzeko eguna izan da, goizean tailerrekin, eguerdian agerraldi jendetsuarekin. Nolako Oiartzun nahi dute haurrek? Galdera horri erantzuna eman diote, irmo. Eta erantzunaren egile haurrak dira, haiek esandako eta erabakitakoetatik bidea egitea baita asmoa, komunitate ikuspegiarekin eta auzolanean. Amesten duten Oiartzun marrazten hasi dira haurrak, eta denak dira ezinbesteko zeregin horretan, elkarrekin eta elkarlanean.
Aisialdi hezitzailea sustatzea du helburu, jolasaren eta sormenaren bidez Oinherrik. Komunitatearen parte hartzea, kolektibotasuna eta euskara oinarri dituen aisialdi eredua aldarrikatzen du. Oiartzunen, ordea, badute horren gaineko esperientzia, besteak beste OarsoIrriak-en parte izan zirelako bertako familiak haurrak erdigunean jarriz, eta aldi berean, Abaraxka Udal Ludotekak bide horri ekiten diolako egunero. Baina orain, Oinherriren parte izanda, herriko esperientziak beste herrietakoekin (eta alderentziz) partekatzeko aukera izango da, taldeen sare bat delako Oinherri, dozenaka herritakoak.
Gaur, hasteko, tailer hezitzaile eta eraikitzaileetan bildu dira haurrak. Sortu dute. Hitz egin, eta ideiak konpartitu. Elkarlanean, lasai, konfiantza giroan. Arizmendieneako lorategiak faktoria txiki baten traza hartu du goizean, irudimenaren, koloreen, irribarreen eta talde lanaren faktoria. Eta galdera bat zuten erantzuteko: Nolako Oiartzun nahi dute haurrek?
Bada erantzun dute. Tailerren ondorengo agerraldian Oinherriko kideek erantzuna eman dute “Herri bizia, parte hartzailea, euskalduna, feminista, anitza, aisialdi eredu hezitzailea duena, komunitatean bizi dena, auzolanean eta herrigintzan aritzen dena, koloretako herri bat, haurrentzako herri bat, jolasten duen herri bat, pertsonak ardatz dituen herri bat”; bistan da, galdera bakarrari erantzun askoko erantzuna eman diote Oinherrikoek. Gaurko ekitaldi nagusi horren proposamenen atalaren gidari Porrotx pailazoa eta Oinherriko Maite Azpiazu izan dira.
Izan ere, askotarikoa da herriari egin dakiokeen ekarpena norberak pertzepzio bat edo horiek guztiak izan ditzakeelako buruan. Denak dira baliagarri eta on, ordea: “Gehiago balio du milak egiten duten apur banak, batek egiten duen mila baino”; Xabier Amurizaren hitz horiek erabili dituzte Oinherrikoek egin nahi dutenaren mamia laburbiltzeko.
Oinherriren Oiartzungo lantaldea, Porrotxekin.
Udaleko ordezkariak ere Arizmendienean izan dira. Haizea Saez de Egilaz Gazteria zinegotziak adierazi du hezkuntzarena familiatik eta eskolatik harago doan prozesua dela, eta etorkizuneko oiartzuarrak hezteko bidean ikastetxeen, hezkuntza ez formaleko eragileen, eta herrigintzako elkarteen bidelagun dela herriko etxea.
Eta komunitate gisara jarduteko ezinbestekotzat eman du elkarlana, norberaren zeregin eremutik betiere: “Komunitate izaera dugu gure baloreen oinarrian, eta modu horretara lan eginez soilik lortuko dugu amesten dugun herria, amesten dugun Oiartzun”. Ametsetatik helburu zehatzetara joanez, udaleko ordezkariak adierazi du oiartzuar euskaldunak nahi dituztela, parte hartzaileak eta kritikoak, ingurumenaren zaintzaileak, aniztasunean berdin eta parekide direnak, eta auzolanean lan egiteko gaitasuna dutenak. Eta Oinherriren zeregina horretan ere zentratzen denez, egitasmoarekin guztiz bat egiten dutela.
Jarrain, goizeko hainbat irudi.
