[Galeria] «Gizarte politikak erdigunean izango dituzten politika publikoak» exijitu ditu Duintasunak
Azken urteotan Euskal Herrian ahulenen egoerak okerrera egin duela salatu nahi izan dute gaurko mobilizazioan, «pribatizazioak sortzen duen diru gosearen ondorioz benetako pobrezia areagotzen delako».
Ekaina ere, nola ez, borrokan hasi dute eskualdeko pentsiodunek. Dozenaka lagunek erantzun diote Duintasuna elkartearen deiari, eta beste behin pentsio duinen aldeko aldarriz bete dute Errenteria-Oreretako erdigunea. Manifestazioan abiatu dira Herriko Plazatik, Pentsio publiko duinak lemapean.
Mobilizazioa hasi aurretik hitza hartu dute elkarteko kideek. Azken urteotan Euskal Herrian ahulenen egoerak okerrera egin duela salatu nahi izan dute gaurkoan, «pribatizazioak sortzen duen diru gosearen ondorioz, benetako pobrezia areagotzen delako». EAEn ere, Gizarte Zerbitzuen Legeak ezarritako eskakizunak ez direla betetzen erantsi dute, finean, Gizarte Zerbitzuen Euskal Sistema «apurtutako sistema» bat dela. Batasun falta ere leporatu diete erakundeei, eta horrek kohesioa eta koherentzia kentzen diola berdintasunezkoak izan beharko luketen zerbitzuak emateari.
«Ezinbestekoa da pertsonen zaintza norberaren etxean indartzea. Funtsezkoa da baliabide publiko nahikoak erabiltzea etxeko laguntza zerbitzuko zaintza zerbitzuko langileen plantillak handitzeko eta lan baldintzak hobetzeko. Era berean, Oinarrizko Gizarte Zerbitzuetako, Informazio, Diagnostiko eta Orientazio Zerbitzuetako langileen estaldura sustatzea, baita mendekotasuna duten pertsonei laguntzeko beste zerbitzu batzuena ere», esan dute gaurkoan.
Gizarte politikak erdigunean izango dituzten politika publikoak exijitu dituzte, «zaintzaileek eta mendekotasuna duten pertsonek bizitza duina izan dezaten».
Horrez gain, bakarrik bizi diren adinekoen egoerarekin oso kezkati agertu dira. Zentzu horretan euskal instituzioek nora eta nola iritsi badakitela diote mendekotasuna duten pertsonei laguntzeko, hauek behar bezala artatzeko, eta gizarte publiko eta kalitatezkoetara baliabide gehiago bidera dezatela eskatu dute. «Egin ezazue, Gasteizko Gobernuaren politikariok!», erantsi dute.
Arreta pertsonaleko zerbitzuak betebehar publikoak direla nabarmendu dute azkenik, eta hauek erantzukizun publikoa dutela. Jarraian, gaurko mobilizazioan ateratako zenbait irudi:
