HemenGuk, Oiartzungo labela duten produktuak
Herriko ekoizleak saretu eta haien produktuei irteera emateko HemenGuk sortu dute, udalarekin elkarlanean. Hilaren 19an azoka egingo dute.
Ekoizleak udaleko ordezkariekin. HemenGuk egitasmoa aurkeztu zuten atzo arratsaldean. Oiartzungo ekoizleak saretu eta haiek sortutako produktuei irteera emateko proiektua da. Ekoizleak elkarlanean aritu dira udalarekin zein beste hainbat herritarrekin. Atzoko aurkezpen agerraldian Eneritz Arbelaitz eta Jon del Olmo zinegotziak izan ziren, ekoizleekin batera.
Bi helburu nagusirekin sortu da HemenGuk proiektua, elkarlanean, atzo azaldu zutenez: “Herriko ekoizleak ezagutzera eman, kontsumitzaileekin harremana sustatu eta herriko produktuak balioan jartzea”.
Marka identifikagarria sortu dute, HemenGuk izenekoa. Bertakoari zein bertakoei erreferentzia egiten die label berri horrek.
Azoka, hasteko
HemenGuk-ek antolatu duen lehenengo ekitaldia bertako ekoizleen azoka izango da. Hilaren 19an izango da —larunbata—, eta hogei ekoizle elkartuko dira Kontzejupean. 09:30etik 14:00etara beraien produktuak ikusi eta erosi ahal izango dira.
Postua jarriko dutenen artean, lehenengo sektoreko ekoizleak daude, baita beste artisau sortzaile batzuk ere. Salmentarako gune izateaz gain, topagune izan nahi du hilaren 19ko azokak, produktu lokalak eta bertako ekonomia suspertzeko.
Jakinarazi dutenez, HemenGuk-ek “aterki zabala” eskaini nahi die Oiartzungo ekoizleei. Horregatik, udalaren, herritarren eta ekoizleen arteko elkarlana ez da hilaren 19ra mugatuko.
Kolaborazio horrek aurrerantzean jarraituko du, bertako produktuak eta ekoizleak indartzen jarraitzeko bestelako egitasmoak ere martxan jartzeko.
Astelehenetan Killirikupen egiten den azoka txikia osatu dutela nabarmendu dute. Bertan elkartzen dira Arraztaloko saskiak, Peluzarko arrautzak, Zituene pasa, Gezamina ogia, Larremotx gazta eta Arabolaza eztia.
Ekoizleak
- Aldako. Txakolina.
- Arabolaza. Eztigintza.
- Arraztalo. Barazkiak.
- Drink mucha. Kombucha.
- Elika. Barazkiak.
- Gezamina. Ogia.
- Ilargi. Egurrezko bitxiak.
- Itsaso. Amets harrapariak.
- Labore. Bertako produktuen denda.
- Larremotx. Gazta.
- Leire Dorronsoro. Bitxiak.
- Lekungarai. Gazta.
- Loregorri. Oihalezko konpresak eta poltsak.
- Minak. Ogia.
- Momotegi. Ahatekiak.
- Pagoa. Garagardoa.
- Papurrak. Ogia eta goxoak.
- Peluzar. Arrautza ekologikoak.
- Trikuharri kultur elkartea. Marrazkigintza.
- Zituene. Pasta.
