Pasaia Kayak taldeko K-2 mistoa txukun aritu da Espainiako Txapelketan
Hamaikagarren izan zen Eukene Saez eta Iñaki Fernandezek osatutako K-2a, guztira 17 kilometroko lana eginda, lehorreko hiru tarterekin.
Joan den asteburuan jokatu zen Madrilgo Talavera de la Reina udalerrian ur lasaietako Espainiako Piraguismoko Txapelketa, maratoi-erdiko modalitatean. Azken aldian indartzen ari den proba mota da hura, eta maratoi modalitatearen ezaugarri berak ditu, palistek lehorretik piragua eskutan dutela lasterka egin beharreko tarteak barne, baina maratoian baino distantzia laburragoak bete behar dituzte proba guztietan.
Gizon-emakumeen K-2 mistoa ere goraka datorren proba da, eta bertan izan ziren talde pasaitarraren ordezkari gisa Eukene Saez eta haren bikotekide Iñaki Fernandez, Euskadiko K-2en txapelketan ere ontzia osatuz parte hartu ondoren.
17 kilometroko lana egin behar izan zuten guztira, lehorreko 3 tarterekin. Hasieratik geratu ziren hirugarren multzoan, eta hamaikagarren postua eskuratu zuten ia minutuko aldea aterata hamabigarren izan zen Piraguismo Badajozeko bikoteari.
Talde pasaitarraren hurrengo hitzordua itsas kayakean izango da, larunbatean jokatuko den Kantabriako Txapelketa Openarekin, eta bertan izango dira taldeko itsas probetako bi espezialista trebatuenetakoak, Lander Rodriguez eta Aritz Araneta.