Autoan pistola bat zeraman gidaria atxilotu dute AP-8an
Ertzaintzaren Eten saileko poliziek Oiartzungo zerbitzugunean gizon bat atxilotu dute, mugimendu arraroak egiten hasi ondoren. Droga ere aurkitu diote.
Ertzaintzak partekatutako argazkia.
Ertzaintzaren iturriek jakinarazi dutenez, 41 urteko gizon bat atxilotu zuten bart, Oiartzungo AP-8 autobideko zerbitzugunean. Eten saileko poliziakideak izan dira atxiloketa egin dutenak (errepideetako delituak prebenitzeko lan egiten dutenak).
Azaldu dutenez, poliziaren presentziarekin urduritu egin zen gizona, eta aparkatuta zeukan autoaren barruan mugimendu “susmagarriak” egiten hasi zen. Ertzainak hurbildu zirenean, dokumentazioa eskatu zioten, eta kotxe barruko gordetegia ireki zuenean pistola izan zitekeena aurkitu zuten.
Gidariari autotik ateratzeko eskatu, eta frogatu zuten gordetegikoa arma bat zela. Gidaria miatu, eta droga eraman zitzakeen poltsatxoak aurkitu zizkioten. Ertzaintzaren Txakur Unitatearen laguntza izan zuten, autoaren miaketa sakonagoa egiteko. Pistolaren kargadorea aurkitu zuten barruan.
Arma izateko baimenik ez zuela-eta atxilotu zuten, eta gaur goizean eraman dute Donostiako auzitegira.
