Bi egun, beroaren kontrako erremedio onena probatzeko
Oiartzungo udako igerilekua larunbatean irekiko dute, 11:00etan. Irailera arte egongo da irekita. Elorsoroko bazkideen kuotan sartzen da.
Gutxiago falta da igerilekua jendez betetzeko [Arg.: @BPXport].
Bi egun besterik ez dira falta udako igerilekua irekitzeko. Datorren larunbatean, hilak 12, irekiko dute, 11:00etan. Eguraldi iragarpenaren arabera, epel antzeko giroa egingo du, eta igerilekuak igandean beteko du bere funtzio nagusia: beroari aurre egiteko erremedioa izatea.
31 graduko gehiengo tenperatura eman dute iganderako, baina errazagoa errazagoa loterian asmatzea.
Ordutegiari dagokionez, 20:00etan itxiko dute igerilekua, ekainean, abuztuan eta irailean. Uztailean ordubete aurreratuko da irekiera, eta beste ordubete luzatu itxiera.
Elorsoro kiroldegiko bazkideek beraien kuotaren barruan sartuta dute udako igerilekuarena. Bazkide ez direnentzako, hainbat tarifa daude eskuragarri. Honakoak dira:
Denboraldiko bonua
- Familiarra: 130,25 euro.
- Banakako heldua (16 urtetik goiti): 97,70 euro.
- Banako gaztea (16 urtetik beheiti): 65,15 euro.
Eguneko sarrera
- Heldua: 7,75 euro.
- Gaztea: 3,90 euro.
- Bost sarrera (heldua): 30,90 euro.
- Bost sarrera (gaztea): 15,55 euro.
Bost urte arteko haurrek ez dute ezer ordaindu beharko.
