Jairik ez Gaztañon; kamiseta bai, ordea
ostiral honetan hitzaldi zikloen barruan beste hitzordu bat antolatu du Gaztañoko Auzo elkarteak
Sorgin gauak hartu du Gaztaño. Aurten ere ez du Gaztañok auzoko jairik antolatuko. Halere, hitzaldiak, ikastaroak eta tailerrak antolatzen jarraitzen dute COVID-19aren harira ezarritako segurtasun eta osasun neurriak errespetatuta. Jairik ez, baina jaietako klasikoa bilakatu den kamiseta berezia ere egingo du aurten auzo elkarteak. Horretarako, marrazki lehiaketa antolatu du.
Uztailaren 11 arte izango dute lehiakide ausartak marrazki eder bezain originalak helarazteko aukera. Auzo elkartearen lokaleko postontzian sartu behar dituzte marrazkiak parte hartzailearen kontaktu datuekin batera edo posta elektronikora mezua bidali.
Ezinbesteko baldintza da Maritxu Mozkorra marrazkian azaltzea, hortik aurrerakoak parte hartzaileen irudimenaren esku gelditzen dira.
Getariako naufragioak
Bestalde, ostiral honetan hitzaldi zikloen barruan beste hitzordu bat antolatu du Gaztañoko Auzo elkarteak. Ontziak, itsasoa eta naufragioak izango dira protagonista, Getariako Naufragioak XX. mendean liburua aurkeztuko dutelako Ana Maria Benito eta Javier Mazpulek. 19:00etan izango da Gaztañoko Auzo elkarte berriaren lokalean.
