Tenerifeko hilketa matxistak salatzeko elkartu dira
Minutuko isilunea egin dute udaletxearen aurrean hainbat udal hautetsik eta langilek, EUDELek egindako deialdiari jarraiki.
Elkarretaratzearen une bat. Lezoko Udaleko ordezkari politikoak eta udal langileak eguerdian elkarretaratu dira, Tenerifeko (Kanaria uharteak, Espainia) hilketa matxista salatzeko asmoz. Minutuko isilunea gorde dute udaletxearen atarian, EUDELek deitutako deialdiari jarraiki. “EUDEL Euskadiko Udalen Elkarteak Anna eta Oliviaren hilketa krudela gaitzesten du, eta elkartasuna adierazi nahi die familiari eta hurbileko pertsonei, bai eta indarkeria matxistaren biktima guztiei ere”.
EUDELek plazaratutako oharra bere egin du gobernu taldeak. Bertan agertzen denez, emakumeen heriotzek haien kontrako indarkeriaren “arazoaren alderdi bat baino ez dute erakusten, eta egoera hori emakumeen eta gizonen arteko desberdintasunean sortzen da”. Hala, emakumeen kontrako indarkeria giza eskubideen urraketa dela jasota dago agirian.
