Hiri paisaian ere arrastoa utziko du 700. urteurrenak
Idoia Beratarbide artista oiartzuarrak sortutako artelana horma irudi bihurtuko dute Agirre Lehendakariaren plazan.
Idoia Beratarbide artista, apirilean proiektu artistikoa aurkezteko unean, Agirre Lehendakariaren plazan bertan.
700 urteurrenak arrastoa utzi du herrian eta herritarrengan. Ez da zalantzarik. Testuinguru konplexu bezain gogorrean, inoiz baino gehiago atera zuen udalerriak barnean duen komunitate sena iazko apirilean. Orain, beste arrasto bat utziko du, oraingoan udalerriaren hiri paisaian. Idoia Beratarbide artista oiartzuar handiak sortu duen proiektuak beteko du Agirre Lehendakariaren Plazan dagoen horma. Arteak, hezurmamituko du 700 urteurrenaren legatua eta horman tatuatu. Apirilean eman zuten proiektuaren berri, eta orain, berriz, horma irudi hori egi bihurtzeko eta pareta handira eramateko kontratazioa egin duela jakinarazi du udalak.
Santa Klara kaleko 5-15 zenbakiko eraikineko arkupearen fatxada hartuko du horma irudiak eta Agirre Lehendakariaren plaza aldera begira jarriko dute. 28.000 euroko diru zatia inbertituko du udalak horretarako. Lanen zuzendaritza, Beratarbidek berak egingo du, eta bost asteko epea izango dute amaitzeko.
Apirilean aurkeztu zuten Beratarbideren artelana, orain horma irudi bihurtuko dutena, eta orduan azaldu zuen artistak, enkargua jasotzerakoan ezinbestean erreparatu ziola memoria historikoari; erreparatze horretan ezinbestean azaldu zitzaiola begi aurrera Lino Fabrika, “lino herriko imajinarioan oso presente dago, espazio honetaz mintzatzean”. Lanaren ardatza berehala erakutsi omen zioten paperean marraztutako lehen zirriborroek: “Errenteriako emakumeei buruz hitz egingo zuen murala izango zen. Lihoarekin haria egiten da eta irudi horrek lagundu zidan lana aurrera ateratzen”.
Mural Errenteriako emakumeen historia garaikidea jarraitzen du, lihozko hariak gidaturik. Eskuek garai ezberdinetako emakumeak, gertaera historikoak lotuko dituzte eta amaieran, eskuz esku eraikitako bide horrek gaur egungo emakumeengan eta haurrengan izan duen eragina islatzen saiatu da artista.
Udan egingo da esku hartzea, eguraldi onarekin eta ikastola itxita egonik. Proiektua bizilagunekin zein Orereta Ikastolarekin adostuta dago.
Beratarbide
Beratarbide oiartzuarra da, baina Errenteria-Oreretarekin lotura du. Lan asko egin ditu Errenteriarekin lotuta, bere ekarpena Errenteriari handia da, eta udalarekin elkarlanean ere aritu da. Besteak beste, Koldo, zein Errenteriako emakumeen aztarnak: Narrazioak liburuak ilustratu ditu—azken hori Allende Arnaiz Garmendiarekin batera—, eta Asteme, Katuko eta Oilarqueen pertsonaiak diseinatu ditu, Joxe Mari Carrerek sortutako istoriotik abiatuta.
