Pasaiako aparkalekuen ordenantza berria, bertakoentzat onura bila
Antxon eta San Pedron batez ere, bertakoek aparkatzeko irizpideak findu nahi ditu udalak ordenantza berriarekin. Pasaitarrek ekarpenak egin ditzakete.
Pasaiako herritarrek aparkatzeko izango duten ordenantza berria lantzen ari da Pasaiako Udala. Horren oinarrian dago bertakoei lehentasuna ematea ibilgailua kalean aparkatzerako garaian. Gaur arte, bandoen formula erabili da, Izaskun Gomez alkateak esan duenez, aparkalekuen banaketa arautzeko. Ordenantzaren bidez, ordea, bertakoentzako bakarrik ezartzen diren guneak kontrolatzeko, kudeatzeko, eta zehapenak ezartzeko garaian lege babesa izateko aukera egongo da. Bereziki Antxon eta San Pedron izango du eragina bertakoen aparkalekuen ordenantza berriak.
Ordenantzaren espedientea Pasaiako Udalaren webgunean dago, han daude xehetasunak. Bada hori jendaurrean dagoenez, pasaitarrek aukera izango dute ekarpenak eta iradokizunak egiteko 15 eguneko epean, HAZ bulegoan, edo horretarako egokitu den posta elektroniko helbidearen bidez.
Ordenantzaren espediente horretan jasota dauden punturik adierazgarrienak dira honakoak:
- Bertakoen txartel berriak egitea. Txartel horien bidez, bertakoentzako eremuak arautu eta ekitatea bermatu beharko da.
- Bertakoentzako eremuak eta kaleak, orain daudenak kontuan hartuz.
- Bertakoentzako aparkaleku-txartel berria eskuratzeko irizpideak, baldintzak eta prozedura ezartzea.
- Bertakoen txartela duten ibilgailuek aparkatzeko ordutegi esklusiboak eta horiek ez betetzeagatik aurreikusitako zehapenak ezartzea.
- Irizpide komun eta homogeneoak gaur egun araututa dauden eremu guztietan, bertakoek aparkatzeari dagokionez, hori egiaztatzen eta bermatzen duen txartela erabiliz.
- Aparkatzeko beharra eta eremu batzuetan oinezkoentzako erabilera bermatzeko beharra bateragarri egitea.
