Ikasturtea amaitzeko bi hitzordu biribil antolatu ditu Emakumeen Etxeak
Emakumeen pentsioak izango dituzte hizpide ostegunean, eta Josefina Lambertoren gaineko dokumentala emango dute uztailaren 1ean.
Maravillas Lamberto aitarekin batera eraman zuten etxetik falangista eta erreketeek, bahitu, erail eta bortxatu egin zuten. Emakumeen Etxeak ez du ikasturtea edozein modutan amaitu; horren erakusle da datozen egunetarako antolatu dituen bi hitzorduak, zein baino zein interesgarriagoa. Ostegunean, hilaren 24an, izango da lehena. Hitzaldia egingo dute Oneka Euskal Herriko emakume pentsiodunen plataformako Mertxe Mendez eta Nekane Berriotxoarekin. Emakume zein da zure pentsioa? Hilean 600 eurokin bizi daiteke? goiburuarekin, emakumeek lan ibilbidean zehar hartzen dituzten erabakiek pentsioetan duten eragina aztertuko dute, eta pentsioetan dagoen genero arrakala ere izango dute hizpide. Azken zatian solasaldia egingo dute.
18:00etan izango da Emakumeen Etxean bertan eta ezinbestekoa izango da aurretik izena ematea edukiera mugak direla eta, 943 44 96 30 telefono zenbakira deituta, edo helbide elektronikora idatziz.
Bigarren hitzordua, berriz, Flocerica dokuforuma da. Uztailaren 1ean izango da, 19:00etan Niessen Kulturgunean. Josefina Lanbertok bere bizitzaren nondik norakoak kontatzen ditu bertan lehen eskutik. Aitaren eta ahizparen bahiketa, erailketa, eta bortxaketatik hasita, bizitzan pasatako lanak eta izandako arazoekin jarraituta. Pasatako minak, beldurrak, frustrazioak lehen lerrora ekarri ditu dokumentalak, baita bere indarra ere.
Virginia senosoainek eta Juan Luis Napalek zuzendutako filma da, Segunsurja Filmsen sortzaileak dira biak, eta Nidos desnudos-Kabi biluziak, Valentina ausartatxo klown, 25:37:16 zein InsurgenZia bezalako lanen egileak.
Emanaldia doakoa izango da, eta gonbidapenak behar dira bertaratzeko. Emakumeen Etxean astelehen eta ostiraletan 09:00etatik 13:00etara, eta asterate, asteazken eta ostegunetan 16:00etatik 20:00etara, Lekuona Fabrikako harreran astelehenetik ostiralera 10:00etatik 13:00etara eta 17:00etatik 20:00etara, edo webgunean eskuratu ahal dira.
Neska gazteen txokoa
Emakumeen Etxeak, bestalde, gogorarazi du oraindik ere plaza libreak daudela neska gazteen txokoaren hirugarren tailerrerako. Zer da ederra izatea? goiburuarekinhilaren 26an izango da, euskaraz, 10:00etatik 14:00etara eta 16 eta 25 urte arteko neskei zuzenduta dago.
Errenteria-Oreretako Memoria Feministaren murala diseinatzeko tailerrean ere plazak libre daude oraindik. Bi saio egingo dira, hilaren 29an edukiari buruzko ideiak proposatzeko eta uztailaren 6an, muralaren zirriborroa adosteko; 18:00etatik 20:00etara dira bi tailerrak.
Bi kasuetan izena emateko 943 44 96 30 telefono zenbakira deitu behar da edo posta elektronikora mezua bidali.
