Euskara ikasteko sei diru laguntza lerro ditu Lezoko Udalak
Laguntza horien eskaera urtean zehar egin daiteke, baterako izan ezik: euskaltegian matrikulatzekoa uztailaren 2ra arte eska daiteke.
Joxemari Iraola Euskara teknikaria, Jesus Mari Martiarena alkatea, eta Ion POmbar Euskara zinegotzia diru laguntzen berri emateko agerraldian. Euskararen ezagutza eta hobekuntza sustatze aldera, Lezoko Udalak sei diru laguntza lerro dituela jakinarazi du. Horiek eskatzeko epea urte osokoa da, batekoa kenduta: Oroitzene AEKn ikasketak egin nahi dituztenek uztailaren 2ra arteko epea dute eskaera egiteko. Dena dela, eskaerak egiteko jarraibideak Lezoko Udalaren webgunean aurki daitezke.
Ion Pombar Euskara zinegotziak nabarmendu du diru laguntza eskaera horiei erantzuteko 35.000 euroko ditu zatia dutela gordea udalean. “Euskara sustatzen jarraituko dugu. Adibidez, euskaltegiko matrikulen %100 berreskuratzeko aukera dago”, zehaztu du zinegotziak.
Honakoak dira udalak diruz laguntzen dituen jarduerak:
- Euskara ikasi euskaltegian: Lezoko Udalak euskaltegiko matrikulen %100 itzultzen du %85etik gorako asistentzia duten ikasleei.
- Unibertsitatean udan euskaraz emandako ikastaroetan matrikulazioa, UEUn eta EHUn.
- Aisialdiko begirale/zuzendari ikastaroa egiteko.
- Elkarteen/erakundeen lokaletako edota merkataritzako enpresetako errotulua euskaraz jartzeko.
- puntu.eus domeinua hartzeko.
- Udalerriz gaindiko eremuetan euskara sustatzen dabiltzan erakundeak.
