San Joan bezperako soka-dantzak ez du hutsik egingo Lezon
Biharko (asteazkena) 22:00etan izango da Gurutze Santuaren plazan. Plazarako bost sarbideak kontrolatuko dituzte, gonbidapena dutenak bakarrik sartu ahalko dira.
Bihar da San Joan bezpera, gau berezia oso Euskal Herrian, eta nola ez, Lezon. Lezoko dantzari talde batek, iaz bezala, osasun egoerak ezarritako zailtasunei aurre egin eta usadioa bizirik mantentzeko zereginean ez du etsi. Aurten ere, soka-dantza izango da Gurutze Santuaren plazan. Berezitasunekin. Baina magikoa edonola ere. Udako solstizioko gaua da.
22:00etan hasiko da soka-dantza, helduena da, emakumeena nahiz gizonena (aurten ere haurrena ez da egiterik izango). 30 bat dantzarik eta sei musikarik parte hartuko dute. Bost laguntzaile ere izango dituzte kultur ekitaldiaren antolatzaileek: Gurutze Santuaren plazara soilik aurretik sarreraren erreserba egin dutenak sartu ahalko dira, eta laguntzaile plazarako bost sarbideetan egongo dira zaintza lanean nahiz tiketak eskatzen. Horiek doan dira, eta Lezoko Udalaren webgunetik edo bihar Kultura Aretoan lor daitezke. Erne: 106 pertsonarentzako eserlekuak izango dira soilik plazako espazio eszenikoan, hori da aforo muga.
Gau espeziala da San Joan bezperakoa. Lezoko dantzari talde batik esker, ohitura hori mantenduko da, zailtasunak zailtasun, eta pandemiak pandemia.
