'Tipularen sehaska kanta' filmak argia ikus dezan, crowdfundinga abiatu dute
Espetxea eta eritasunaren gordina nola bizitzen den azaldu nahi du Lander Garro oreretarrak zuzendu eta Sare Herritarrak eta Gasteibeltza produktorak ekoitzi duten film dokumentalak.
'Tipularen sehaska kanta'-ren fotograma bat. Tipularen sehaska kanta filma zuzendu du Lander Garro idazle, argazkilari eta dokumentalgile oreretarrak. Ekoizpenaren atzean, Sare Herritarra eta Gasteibeltza produktora daude eta iraila-azaroa bitartean estreinatu nahi dute, eta argia ikus dezan, crowdfunding kanpaina abiatu dute orain. Espetxea eta eritasunaren gordina nola bizitzen den azaldu nahi du film dokumentalak. Izena, Miguel Hernandez poetak semeari eskainitako poema batek eman dio filmari. 1936an preso hartuta, 1942an hil zen espetxean poeta handia tuberkulosiak jota. Emazteak jatekorik apenas zutela, tipula baino ez, erantzuten zion gutunetan, eta hortik sortu zuen poema. Horretan oinarrituta, galdera bat erantzuten saiatu da Garro film dokumentalaren zuzendaria, politikotik baino, emozionaletik landuaz berak azaldu duen bezala: espetxeak 1942an hiltzea zentzurik ez bazuen jada, ba ote du zentzurik gaur?
Larri gaixo dauden 18 euskal preso dira Frantzia eta Espainiako Estatuetako eta Euskal Herriko espetxeetan, eta 36dira bizia gaitzak jota galdu dutenak Sare Herritarrak azaldu duenez. Gogoan izan ditu, halaber, espetxetik, heriotza ate joka eta gaitzak atzera bueltarik ez deunean kaleratu dituztenak, “1942an bezalaxe, gaitza eta espetxearen arteko talkak heriotza zigorra izaten jarraitzen du oraindik ere”.
Tipularen sehaska kanta filmean errealitate horren sortzen duena erakutsi nahi izan du Sare Herritarrak. Horretarako, Garrok espetxea eta gaitza ezagutu duten pertsonekin, senideekin, adituekin… elkartu da, euren bizipenetatik abiatuta kontakizuna eraikitzeko. Lehen pertsonan eta barru barrutik kontatutakoa da filma.
Bi preso larri gaixo Errenteria-Oreretan
Gaixotasun larri eta sendaezinak dituzten presoen zerrendako bi oreretarrak dira: Mikel Arrieta eta Aitzol Gogorza. Arrieta berriki ekarri dute Martuteneko espetxera, eta Gogorza etxean ari da betetzen zigorra.
Arrietak, Espondilartropatia kroniko seronegatiboa HLA B 27 du, gaixotasun kroniko, degeneratibo eta sendaezina. Gorputz adarretan eragiten dio gaitzak, eta oso mingarria izateaz gainera, oldarkorra dela nabarmendu dute. Azaroan Algecirasko espetxetik (Andaluzia. Espainia) Soriakora lekualdatu zuten Arrieta, eta orain Martutenera hurbildu dute. 2000ko urtarriletik dago espetxean oreretarra ezarri zioten 30 urteko zigorra betetzen. Iazko uztailean bete zituen kondena osoaren hiru laurdenak.
Gogorza ere larri gaixo dago, eta2019ko apiriletik espetxealdi arindua ezarrita etxean zigorra betetzen ari da oreretarra eskumuturreko telematikoarekin; etxetik terapietara joateko irteteko baimena du bakarrik. Nahasmen obsesibo konpultsiboa du Gogorzak.
Filmak argia ikus dezan cronwfunding kanpaina martxan da dagoeneko, eta ekarpena egiteko moduak asko dira. Hemen kontsulta daiteke informazio guztia, eta ekarpena egin.
Film-dokumentalaren kartela.
