Euskal Herriko eta Valentziako pilotariak, aurrez aurre Oiartzunen
Plaza librean, bote luzean, mahi jokoan eta pasakan arituko dira bi herrialdeetako pilotariak, uztailaren 3an eta 4an, Beheko Plazan eta Kontzejupean.
Pilota valentziarra eta euskal pilota.
Euskal Herriko eta Valentziako pilota selekzioak elkarren kontra arituko dira hurrengo asteburuan, joko zuzeneko hainbat modalitateetan.
Uztailaren 3an —larunbata— Beheko Plazan partida bat baino gehiago ikusteko aukera egongo da goiz eta arratsaldean. Igandeko partida, berriz, Kontzejupean jokatuko dute. Honakoa da egitaraua:
Larunbata, uztailak 3
- 10:30ean: Gizonen bote luze partida.
- 12:00etan: Emakumeen plaza libreko partida.
- 13:00etan: Gizonen plaza libreko partida.
- 17:00etan: Emakumeen mahi jokoko partida.
- 18:00etan: Gizonen mahi jokoko partida.
Igandea, uztailak 4
- 11:00etan: Emakumeen pasaka eskuz partida.
Euskal herritar eta valentziarren arteko partidak antolatzeko, Euskadiko Euskal Pilota Federakuntzaren, Euskal Kirol Federazioen Batasunaren, Eusko Jaurlaritzaren, Oiartzungo Udalaren eta Txosten parte hartzea izan da.
