Musika eta erakusketa, asteburuko Kulturabirusaren menua
Heltakoek erakusketa egingo dute gaur arratsaldean, baita gitarra kontzertua eskaini ere. Bihar, Xoaco eta Paula Amievaren txanda izango da.
HELTAkoek beren lana ezagutaraziko dute. Kulturabirusak hedatzen jarraitzen du. Asteburu honetarako pare bat zita jarri dituzte. Gaur arratsaldean, HELTAkoak izango dira ikasturtean zehar egindako lana herriari erakutsiko diotenak.
18:00etatik aurrera egongo dira Arizmendienean (eguraldi txarrarekin, kontzejupean). Ikastaroetan sortutako eskulanak eta beste hainbat gauza erakutsiko dituzte. Horrez gain, gitarra taldekoek saiotxo bat eskainiko dute toki berean.
Bihar, berriz, Herri Musikaren Txokoak antolatutako kontzertuen txanda izango da. Xoaco eta Paula Amievak Asturiasko herri musika ekarriko dute.
Ohi bezala, bi saio egingo dituzte. 11:30ean haurrei zuzendutakoa izango da, eta helduentzakoa, berriz, 19:00etan. Gonbidapenak telefonoz 943 49 45 21 telefono zenbakira deituta edo e-posta bidez idatzita eskura daitezke. Arizmendienean izango dira bi kontzertuak, eta eguraldi txarrarekin, parrokian.
Datorren asteko ekitaldiak
Asteartean —hilak 29— Biyurrieneak antolatutako hitzaldiaren txanda izango da. Mendian hil, hirian hil dokumentala eskainiko dute ikastolako jangelan, 19:00etatik aurrera. Ondoren, mendian hildako pertsona baten lagun batek hitzaldia emango du. Sarrerak telefonoz edo e-posta bidez eskuratu beharko dira.
Ostegunerako, berriz, bi proposamen. Alde batetik, garagardo artisau tailerra eskainiko du Otsaihenek, 19:00etan, ikastolako jangelan. Informazio gehiago, hemen.
Ordu berean, Arizmendienean (eguraldi txarrarekin, udaletxean), Ilunabar filosofikoa: Egin daiteke umorerik? saioa eskainiko dute. Sarrerak turismo bulegoan eska daitezke, uztaileko ekitaldia baita.
