Oiartzuarrek herriarteko bigarren txapela gehitu nahi dute
Oiartzungo pilotariak laugarren aldiz arituko dira Gipuzkoako Herriarteko Txapelketan. Azken hamarkadako talderik arrakastatsuena izango dute parez pare: Azpeitia.
Oiartzungo ordezkariak, herriarteko lehenengo jardunaldian.
Oiartzunek ibilbide bikaina egin du 2021eko herriarteko txapelketa arraro honetan. Arerioak bata bestearen atzetik erori dira finalerako bidean: lehendabizi, Azkoitia; Bidania-Goiatz, ondoren; eta Alegia, azkenik. Bihar iritsiko da Gipuzkoako Herriarteko Txapelketaren azken geltokia: finala. Azpeitiaren kontra jokatuko dituzte hiru partidak, bihar arratsaldean, 16:30etik aurrera, Idiazabalgo Igarondo pilotalekuan.
Asier Retegi da Oiartzungo pilotarien ordezkaria, eta egindako ibilbideari errepaso azkar bat eman dio.
«Lehenengo kanporaketa, Azkoitiaren kontra, espero baino errazago irabazi genuen. Bigarrenean, berriz, Bidania-Goiatzen kontra espero bezala irabazi genuen. Ataun pasatzea espero genuen, baina Alegiak sorpresa eman zuen eta guretzako hobe izan zen». Kanporaketa ustez errazenak izateagatik, partida horiek jokatu egin behar direla ohartarazi du Retegik.
Pasa den asteburuan Madalensoron jokatu zituzten finalerdietako itzuliko partidak, eta —hor bai— lasai antzean aritu ziren oiartzuarrak. Izan ere, Alegiako lehenengo bi partidak 22-0 eta 22-16 irabazita, bazekiten sailkapena «eginda» zegoela. «Hiru partida irabazita eta tanteoa horrelakoa denean oso zaila da horri buelta ematea», zehaztu du.
Horregatik, Madalensoron herriartekoan jokatzeko aukera gutxi izan dutenek zapaldu zuten kantxa. «Oiarpen pilotari sorta handia daukagu eta aukerak ematen dizkiegu ahal dugunean aldatzeko. Nik behintzat erabakia hartu nuen jokatu ez dutenei aukera emateko, ahal den neurrian behintzat».
Izan ere, Retegirentzat «dena ez da irabaztea».
Txapelketa publikorik gabe egin da; bihar gutxi batzuk egongo dira
Herriarteko txapelketan parte hartzen dute, bai, baina Oiarperen aterkipean denboraldi osoan egoten dira elkarrekin. Talde-izpiritua gorde behar da. «Giro ona sortzea ere garrantzitsua da». Finalerdietan aukera eman zien ordura arte debuta egin ez zuten pilotariei. «Tanteo aldea handia izan zenez seitik lau pilotarik lehendabiziko partida zuten herrien arteko txapelketa honetan».
Aurtengo herriartekoa ezohikoa izan da, publikorik egon ez delako. «Tristea bada egoera. Beti izan da txapelketa berezia, eta jende asko biltzen da partidetan. Pena ematen dit horregatik, baina finalean jendea egoteko aukera edukita pozik gaude behintzat».
Oiartzuarren babesa
Pilotalekuak orain arte hutsik egon diren arren, bihar egongo da publikoa. Retegik adierazi duenez, negoziazioetan aritu dira pilota federazioarekin, finala Gipuzkoako pilotalekurik handienean egiteko: Donostiako Atano III.an. «Txapelketari prestigioa emateko frontoirik egokiena da, eta, zergatik ez, Oiartzungo publiko gehiago joan daitekeelako».
Goierrira joateko espedizioa antolatuta dute: kantxan arituko dien sei kirolariez gain, klubeko beste dozena bat kide joango dira, ordezko eta zuzendaritzakoen artean; horrez gain, beste 71 pertsona ere joan daitezke. Gainera, bi udal ordezkari ere joango dira.
Retegik jakinarazi duenez, aste osoa eman du talde titularra pentsatzen. Ez du pistarik eman nahi izan, noski. Faboritoak azpeitiarrak direla esan du. «Azken urteak ikusita, faborito haiek dira. Gu ahal duguna egitera joango gara eta finala denez irabazteko asmotan joango gara, baina badakigu ez dela erraza izango. Gero, jokatu egin behar da. Itxaropena beti dago». Oiartzuarrek txapelketa prestigioduneko bigarren txapela gehitu nahi dute beraien apalategian.
