Hibaika hirugarren, Pasaiako Ikurrina estropadan
KAE2 Ligan seigarren sailkatu zen Hibaika, eta bost puntu poltsikoratu.
Hibaikako emakumeak aurreko estropada batean. Argazkia: Hibaika Arraun Elkartea ETE ligako ontziek Pasaiako Ikurrina izan zuten atzo jokoan. Hibaikakoak hirugarren sailkatu ziren eta bederatzi puntu lortu atzoko estropadan. Sailkapen orokorrari dagokionean, hirugarren doaz taulan errenteriarrak 26 punturekin, Tolosaldea eta Deusturen atzetik. Hurrengo asteburuan bi hitzordu dituzte ETE Ligakoek. Larunbatean lehena, Donibane Lohizuneko estropadan 16:30ean, eta igandean 10:00etan Portugaleteko uretan Sestaoko Udalaren III. Bandera eskuratzeko.
KAE2 Ligan, berriz, seigarren sailkatu da Hibaika, eta bost puntu lortu. Lehenengo txandan aritu ziren Elantxobeko estropadan, eta denbora onena egin beraien txandan. Sailkapen orokorrean, zortzigarren dira errenteriarrak. Datorren larunbatean Mutrikun dute estropada 17:00etan.
Asteartean traineruen aurkezpen ofiziala
Asteburuko estropaden aurretik, baina, beste hitzordu garrantzitsua dute Hibaikaren bi ontziek eta tripulazioek. Haien aurkezpena egingo dute asteartean, 18:30ean Papresa inguruan. Egungo osasun krisi testuingurua kontuan hartuta, traineruen aurkezpena prentsarako baino ez du egingo klubak.
