HAPOan herritarren parte hartzea ez murrizteko eskatu du oposizioak
PSE-EE eta EAJk atzo onartutako dokumentuak hainbat murrizketa dakartza planaren parte hartze fasean. Podemos eta EH Bilduk kontra bozkatu dute.
PSE-EE eta EAJk aldeko bozka eman izanagatik parte hartze programaren aldaketa onartua izan zen. 
Pasaiako Hiri Antolamenduko Plan Orokorraren (HAPO) prozesu parte-hartzailea hil hasieran abiatu zen eta uztailaren 1ean bukatuko da. Epe horren barruan, pasaitarrek zer-nolako udalerria nahi duten erabakitzeko aukera izango dute, baina, pandemiaren ondorioz, aurreikusita zegoena baina murrizketa gehiagorekin.
Izan ere, barrutikako bilerak bertan behera utzi eta informazio hitzaldi bakarra egin zuten hilaren lehenean, Donibaneko Juanba Berasategi aretoan (bideoa ikusgai dago edonorentzat Youtuben). Hortaz gain, udalaren webgunean badira zenbait galdera-erantzun eta informazio, eta bertatik eman ahalko dute bizilagunek etorkizuneko Pasaiari buruzko ikuspuntua.
Atzo udaletxean izandako udalbatzarrean, kontrako bozka eman zioten oposizioko bi taldeek HAPOko herritarren parte hartze programaren aldaketa zehazten duen dokumentuari. Bertan arautzen da, hala nola, aipatutako barrutikako saioen ezabatzea edota ipintzea aurreikusita zegoen karpa informatiboen zerbitzua alboratzea, besteak beste.
Ahal Dugu-Podemos alderdiko bozeramaile Julen Rodriguezek harridura adierazi zuen dokumentuaren onartzearekiko, izan ere, murrizketa horiek planteatu zirenean Pasaiako egoera epidemiologikoa egun denaren “oso bestelakoa” zela aitortu baitzuen, kutsatze tasa oso altuarekin: “Egoera hori ez dator bat egungo errealitatearekin, eta, hortaz, ezezko bozka emango dugu”.
Udal gobernuaren izenean hartu zuen hitza Nahikari Otermin jeltzaleak, azaltzeko nahiz eta egoerak hobera egin duen, oraindik ere “gorabeheratsua” dela, eta pasaitarren segurtasun nahiz osasuna bermatzeko ezinbestekoa dela murrizketa horiei men egitea, “kontrakoa arduragabekeria hutsa irudituko litzaiguke”.
Rodriguezen bide beretik ekin zion EH Bilduko Iraitz Pazosek koalizioaren aurkako boza arrazoitzeko. “Anbizio gutxiko” iritzi zion PSE-EE eta EAJk onartutako dokumentuari, “pandemia aitzakia hartuta eta inolako alternatibarik eskaini gabe” herritarren parte hartzea murriztuko dela uste baitu. Gobernua segurtasunaren izenean herritarren eta eragileen parte hartzea murrizten ari dela salatu zuen.
Oterminen ihardespena, honakoa: “Arduragabekeria hitza berriro errepikatuko dut, eta demagogia hitza gehituko dut”. Udal gobernuaren aldeko bozkarekin onartua izan zen aipatutako dokumentua.
