Pandemia astintzeko DJ saioa
Aurten ere ez dira madalenak ospatuko. Horren ordez, herriko hainbat eragileek, osasun egoerara egokitutako ekintza egitaraua prestatu dute. Horietako bat da OarsoIrriak iniziatiba.
Zuzeneko DJ saioa antolatu du OarsoIrriakek. Aurten ere ez dira madalenak ospatuko. Horren ordez, herriko hainbat eragileek, osasun egoerara egokitutako ekintza egitaraua prestatu dute. Horietako bat da OarsoIrriak iniziatiba, eta bere alea jarri nahi izan du haur eta familiei begira. OarsoIrriaken filosofiaren oinarrian haurrei galdetu eta familiekin ekintzak egitea dago, baina oraingoan, iniziatibak azaldu duenez, ezin izan dute galdeketa behar den denborarekin bideratu. Ekintza proposatzerakoan, ordea, aurreko urteetan haurrek egindako gogoetak izan ditu kontuan, eta musika eta dantza behin eta berriz errepikatzen den ideia zela ikusirik, DJ saioa antolatzea erabaki du dinamikak.
Ez da bakarrik arituko, azken urteetan herriko eragileek sinergiak batu eta gauza eder bezain interesgarriak sortu eta antolatu dituzte elkarlanean. Oraingoan, Furious Konpartsarekin batera arituko da OarsoIrriak saio berezia antolatzeko; eta horretarako, herriko haurren laguntza behar dute. Uztailaren 31n, 12:00etan proposatu dute zuzeneko DJ saioa Koldo Mitxelena ikastetxeko jolastoki estalian. Saio horretarako baina, doinuak behar dituzte, kantak, barra barra, eta hori izango da herriko haurren eginkizuna, saioa atontzeko euskarazko kantak proposatzea eta eskatzea. Eskaerak egiteko azken eguna, uztailaren 6an izango da, eta beren proposamenez gain, etxekoenak, izeba-osabenak, aiton-amonenak edota lagunenak biltzeko eskatu diete antolatzaileek, “nahi izanez gero eskatzailearen izen abizenak eta adina ere bidali dezakete eskaera egiteko unean”. Eskaerak posta elektronikora idatzita egin behar dituzte.
Osasun egoerara moldatutako ekintza izango da, baina, pandemia, apur batean bada ere familian astintzeko aukera izango da OarsoIrriak eta Furiousen proposamenari esker.
