Herriko soka-dantza, Gezalako pantailan
Lezoko dantzari eta musikari talde batek sortutako ikus-entzunezkoa ostiralean ikusi ahalko da Gezala Auditoriumean. Bigarren saioak izango dira.
Iaz, pandemia betean, hainbat belaunalditako Lezoko dantzari eta musikariek ikus-entzunezkoa sortu zuen, San Joan bezperako Lezoko soka-dantzaren gainekoa. Hori jendaurrean jartzeko aroa aurten iritsi da. Izan ere, ekainaren 21ean bideo dokumentala Gezalan eman zuten, emanaldi bikoitzean: bietarako sarrerak agortu egin ziren.
Arrakasta hori ikusita, dokumentala egin dutenek erabaki dute bigarren aukera ematea lezoarrei ikus dezaten: ostiralean izango da Izan zirelako gara eta izango dira sorkuntza bigarrenez ikusteko aukera, Gezala Auditoriumean, emanaldi bikoitzean (19:00etan eta 20:15ean). Doan dira saioak, baina aurrez gonbidapena lortu behar da Lezoko Udaleko webgunearen bitartez.
