Txapeldunorde izan da EPLE
Emaitzak onak diren zalantzarik ez da, eta horrek pilotariak lanean jarraitzera animatu ditu.
Iker Urmeneta pilotaria. Argazkia: Gipuzkoako Euskal Pilota Federazioa Saiatu dira, baina ez dute lortu azkenean. EPLE Euskal Ligako Pala Motzeko Ohorezko Mailan eta Gipuzkoako Txapelketako Pala Nagusian txapeldunorde izan dira EPLEko pilotariak. Pala Motzeko finala Laudioko Arte pilotalekuan jokatu zen eta Estefanok eta Rubenek 40-21 galdu zuten. Lehen hamabost tantoetan ederki eutsi zioten errenteriarrek, baina hortik aurrera ez zuten aukerarik izan. EPLEkoek maila altua eman dute txapelketa guztian zehar.
Igande honetan Andoaingo Arrate pilotalekuan jokatutako Gipuzkoako Txapelketako Pala Nagusiko finalean 40-21 galdu zuten Abel eta Rubenek. Meritu handia dute EPLEkoek, bi pilotariak atzelariak izanik finalean sartu direlako.
Gipuzkoako Trinketeko larruzko paleta txapelketaren finalean ere ez zuten lortu garaipenik, Eiheramendi eta tabernak, arerioei lana zaildu bazieten ere, eta 34-40 galdu zuten. Azkenik, eskuz binakako euskal ligan Taberna eta Chiapusoren porrota, 31-40.
Txapelketa ofizial federatuari dagokionez amaitutzat eman du denboraldia EPLEk. Balantzea egin du pilota elkarteak, eta honakoa, aspaldiko denboraldirik onena izan dela esan du. Hiru titulu ofizial lortu dituzte errenteriarrek, seitan txapeldunorde izan dira, eta Errenteriako taldea Herriarteko Pala Txapelketan finalista izan da. Datorren denboraldian, EPLEk ohorezko mailan jokatuko du, gainera Eskuz Binakako Gipuzkoako Txapelketan eta Pala Motzeko Euskal Ligan.
Batzokiko KT taldeak Gipuzkoako Txapeldunen titulua lortu zuen, bestalde, gomazko paletan, eta bigarren mailara igo datorren denboraldiari begira.
Emaitzak onak diren zalantzarik ez da, eta horrek pilotariak lanean jarraitzera animatu ditu.
