Etxez etxeko zerbitzuko langileak, greban
Zerbitzuaren enpresa esleipenduna 2019tik hitzarmena sinatzeko "ezgai" dela adierazi du ELA sindikatuak. Iztietan elkarretaratzea egin dute.
Iztietan egin dute elkarretaratzea.
Errenteria-Oreretako etxe etxeko zerbitzuko langileak greban daude, eta elkarretaratzea egin dute Diputazio Plazan. ELAk gogorarazi duenez, udala da zerbitzu publikoa ematen duena. “Zerbitzu horren zati bat pribatizatuta dago, eta Arquisocial enpresaren esku dago; orain Urbaser multinazionalak erosi du”, adierazi dute.
Arquisocial enpresaren hitzarmen kolektiboa 2019ko abenduan bukatu zela gogorarazi dute. “Ez gara gai izan beste hitzarmen bat adosteko, funtsean adostutakoa aplikatzeko bermeak nahi ditugulako, eta zerbitzuaren enpresa esleipendunak horri uko egiten diolako”, salatu dute.
Langileak, “ikusezin”
Esan dutenez, zerbitzu publikoak pribatizatzeak lan baldintzak eta zerbitzua “okertzea” dakar. Horren ondorioz, erabiltzaileak kaltetuta ateratzen direla adierazi dute. “Bizitzako azken etapan ez dute beren beharrak asetzeko behar duten dedikazio eta zerbitzu kalitate egokirik”, esan dute. Gainera, langileak erlojuaren kontra lan egiten dutela gehitu dute.
Zerbitzu soziosanitarioetako langileek pandemian “asko sufritu” dutela gaineratu du sindikatuak, osasun fisikoa eta psikikoa “arriskuan” jarrita. “Ez gara funtsezko langile izan, eta ikusezin izaten jarraitzen dugu”. Sektore feminizatua izateak “eragin zuzena” izan duela zehaztu dute. “Borrokan ari gara gure lan baldintzak hobetzeko”.
Beraien borrokaldiaren bitartez zaintzak “merezitako aintzatespena” lortzea nahi dute. “Horretarako beharrezkoak diren baliabideak erabili behar dira. Gure baldintzek hobera ez duten artean, borrokan eta mobilizazioan jarraituko dugu”.
