Energia iraunkorraren eta klimaren aldeko ekintza plana idazteko prozesua martxan
Udalak hartutako konpromisoez edo egin ditzakeen politikez harago, herritarren inplikazio eta iniziatiba ezinbestekoa da ekintza plan horretan jasoko diren helburuak betetzeko.
Jose Manuel Ferradas Ingurumen zinegotzia, Eneko del Amo Hirigintza zinegotzia eta Elixabete Murua EAJren bozeramailea. Errenteriako Klimaren eta Energia Iraunkorraren aldeko ekintza plana 2030 osatzeko prozesua abiatu du udalak. Bide horretan, ezinbestekoa jo du herriko eragile zein norbanakoen parte hartzea, “gakoa da, mende honetako erronka handienari modu bateratuan erantzuteko”. Lau ardatz jorratuko ditu nagusiki ekintza planak: lurraldea, mugikortasuna, ekonomia zirkularra, eta energia. Lanketa horren osagarri, eragile eta herritarrek ekarpenak egiteko baliabideak jarriko ditu udalak, online galdetegi baten bidez. Horretaz gain, jasotako proposamenak lantzeko eta osatzeko bi tailer ireki ere antolatu ditu udalak.
Jasotako proposamenekin osatuko den emaitza prozesuan parte hartuko dutenen eskura jartzeaz gain, hurrengo hamarkadarako ekintza planaren berri emango du komunikazio bide ezberdinetatik.
2008an eman zitzaion hasiera Europako Alkateen Itunari, udalek borondatez onartutako akordioen bidez Europak ezarritako klima eta energia a,lorreko helburuak bete eta hobetzeko. 2012an sinatu zuen ituna zen Errenteriako Udalak, eta 2015ean Energia Iraunkorrerako Ekintza Plana onartu zuen. Helburua, 2020rako negutegi efektuko gasen isuria %20,16 murriztea. Aurtengo ekainaren 29an Errenteriako Udalbatzarrak itunari atxikitzea erabaki du. Orain, datorren hamarkadarako Klimaren eta Energia Iraunkorren aldeko ekintza plana garatzeko prozesua abiatuko du udalak. Ekintza planaren bidez, klima aldaketa murriztea eta horrek dituen inpaktuetara egokitzeko gaitasuna sendotzea, zein herritarrek energia seguru, iraunkor eta eskuragarria lortu ahal izateko bideak landu nahi ditu.
Testuinguru horretan kokatu behar da eragileen eta herritarren parte hartzearen garrantzia; gakoa da, izan ere, udalak hartutako konpromisoez edo egin ditzakeen politikez harago, herritarren inplikazio eta iniziatiba ezinbestekoa da ekintza plan horretan jasoko diren helburuak betetzeko.
