Portuak hainbat lursail eta ekipamendu doan lagako dizkio udalari
Toporako sarbideak, Herrera mendebaldeko biltegien estalkia, Alkateordetza eta azoka, Alkateordetzako plaza, Ciriza, Donibane eraikina eta Bizkaia plaza dira.
Ciriza etxea da Portu Agintaritzak udalari laga dizkion eraikinetako bat. 
Portu Agintaritzak Pasaiako Udalarekin akordio bat sinatu du portuko ekipamenduen eta lursailen erabilerari buruzko harremanak formalizatzeko. Dokumentuaren arabera, udalari doan lagako zaizkio honako instalazio eta partzela hauek: toporako sarbideak, Herrera mendebaldeko biltegien estalkia, Alkateordetza eta azoka, Alkateordetzako plaza, Ciriza, Donibane eraikina eta Bizkaia plaza.
Akordioarekin, portuak bere titulartasunari eutsiko dio, baina espazio horien gainean udal zerbitzu eta erabilera publikoak egingo direla bermatu beharko da, eta zerbitzu eta erabilera horiek udal jabari publikoaren eta doakoaren izaera emango diete. Baldintza horiek beteta, ez da eperik zehaztu lagatze horretarako.
Lagatze horren eragin ekonomikoa 13,5 milioi eurotik gorakoa da, “eta kopuru hori are handiagoa da akordioaren izaera mugagabea kontuan hartzen badugu”, adierazi du Izaskun Gomez alkateak. Udalburuak uste du akordioak etapa berri bat irekiko duela udalerriaren eta portuaren arteko harremanean.
