Senideei emandako laguntzagatik, esker ona Bengoetxea autobus konpainiari
Hamarkadak egin ditu Bengoetxea autobus konpainiak euskal presoen senide eta lagunak Andaluziako espetxeetaraino eramaten.
Bengoetxea autobudetako ordezkaria Etxerateko ordezkariekin. Kilometroak eta kilometroak, bata bestearen atzean. Hori da dispertsioak euskal presoen senide eta lagunei ezarri dien zama urteetan, eta egun ere hala izaten jarraitzen du. Espainiako Barne Ministerioak duela bi egun jakinarazi zuen Andaluziako espetxeetan gelditzen ziren euskal presoak hurbilduko zituela, eta horrenbestez, ez da bat bera ere geldituko Espainiako Estatuan urrunen aurkitzen ziren kartzeletan. Asteroko bidaia horietan laguntza ezinbestekoa izan dute eta izaten jarraitzen dute senideek, furgonetetako hamarnaka gidari boluntarioei esker; senideak eta lagunak batera bidaiatzeko aukera eskaintzen die horrek, baita bolante aurrean ordu amaigabeak egin behar ez izateko aukera eta arnasgunea.
Etxerat elkarteak, bereziki eskertu du hamarkada luze hauetan Andaluziako espetxeetara senide eta lagunak eramaten aritu den Errenteria-Oreretako Bengoetxea autobus konpainiaren lana, “bide honen alderik zailenean senideei lagundu dien konpainia izan da. Urte luzeak igaro dira eta Euskal Herritik Sevillara, Puerto eta Algecirasera –hasiera baten Huelvatik ere pasatzen ziren– astero egiten genituen bidaia beldurgarrietan zerbitzua eskaini digute, ostiral arratsaldetan Donostiatik abiatu eta igandeetako goiz erdian itzuliz”.
Senide eta lagunak lagundu dituzte dispertsioaren gogorrenak ezarritako zigor gaineratu horretan, baina gainera, beti saiatu dela konpainia senideei baldintzarik onenak eskaintzen nabarmendu du euskal preso eta iheslari politikoen senide eta lagunen elkarteak, “autobus berria erostea tokatzen zitzaienean, erretiratzen zuten ibilgailuaren oheak jartzen zituzten. Andaluziako espetxeetara gehiago bidaiatu behar ez dugun une honetan, eskerrak eman nahi izan dizkiogu Bengoetxea Autobusak enpresari”. Zehazki, Fermina Villanueva presidenteak eta Patricia Velez bozeramaileak Etxerat Elkartearen ikur den kinkea eman diote enpresako ordezkariari.
