'Puskak biltzen' ezagutzeko bisita gidatuak, asteburuan
Ostiralean eta larunbatean bisita gidatu bana egingo dute, Eider Bergaretxe Manterolaren eskutik. Turismo bulegoan hartu beharko da txanda.
'Puskak biltzen' erakusketa hilaren 30era bisita daiteke. Uztaila guztian bisita daiteke Puskak biltzen erakusketa, Urdinola-Arizmendienea etxean egokitutako areto berrian. Oiartzungo hamahiru sortzaileren 111 pieza ikus daitezke. Interaktiboa da erakusketa, eta ikuslearen parte hartzea bilatzen dute.
Pieza horietan 13 artisten lanak topatu daitezke: obra jakin bat lautan zatitua batzuetan, obraren zatitxo bat besterik ez besteetan. Egileek azaldu dutenez, pieza bakoitza kontakizun baten leihoa da, eta, era berean, pieza guztiek beste kontakizun bat sortzen dute.
Erakusketa egunero bisita daiteke. Goizez, 10:00etatik 14:00etara egongo da zabalik, eta arratsaldetan, 16:00etatik 19:00etara.
Horrez gain, asteburu honetan bisita gidatuak eskainiko dituzte, Eider Bergaretxe Manterolaren eskutik. Ostiralean —hilak 16—, 18:00etan izango da bisita gidatu hori. Biharamunean, berriz, 12:00etan hasiko da.
Tokia hartzeko turismo bulegotik pasatu beharko da (eraikin berean dago), edo telefonoz deitu (943 50 89 13).
